Ka nisur seanca plenare në Kuvend. Deputetja e PD-së, Jorida Tabaku, akuzoi mazhorancën për shkelje të rregullave parlamentare përmes ndryshimeve në rregullore.
Ajo u shpreh se këto ndryshime cenojnë të drejtat e opozitës dhe ngushtojnë hapësirat e komisioneve që drejtohen prej saj.
“Në Konferencën e Kryetarëve nuk ramë dakord për kalendarin sepse mazhoranca propozoi të prezantohen edhe ndryshimet e rregullores pas zbardhjes nga Kushtetuesja.
Mazhoranca na njoftoi se pret që vendimi i GJK të zbardhet. Ne nuk dimë çfarë informacioni ka mazhoranca që ne nuk e kemi. Dua të njoftoj që ndryshimet e rregullores që PD i çoi në GJK me një vendim të Kushtetuese që i dha të drejtë opozitës për shkelje, janë rasti më flagrant që rregullat në këtë parlament janë shkelur me dy këmbë.
Ndryshimet e reja të propozuara nga PS shkelin të drejtat, dhe krijojnë Komision sikur po ndahen vilajete njëri i nënës, njëri i njerkës.
Nëse GJK nuk zbardh vendimin ne do vazhdojmë normalisht. Por dua të njoftoj që ky diskutim në Konferencë është e nevojshme të sqarojmë që për ne ndryshimet e rregullores të njëanshme , janë në shkelje të gjitha parimeve të bashkëjetesës në parlament.
Por me ndryshimet e rregullores, dhe ato të reja t që mazhoraca ka propozuar edhe hapësirën që kanë Komisionet që drejtohen nga opozita do ngushtohet.
PD ka propozuar edhe një mocion me debat sa i përket raportit të Departamentit Amerikan të shtetit dhe ne ende nuk kemi kryer diskutimin për raportin e parë”, tha ajo.
