Klubi londinez Arsenal F.C. është shpallur zyrtarisht kampion i Premier League, duke i dhënë fund pritjes 22-vjeçare për titullin kampion në Angli, përcjell Euronews.
Titulli u sigurua të martën, pasi Manchester City F.C. barazoi 1-1 ndaj A.F.C. Bournemouth, rezultat që i hoqi matematikisht mundësitë ekipit të drejtuar nga Pep Guardiola për të mbrojtur trofeun.
“Topçinjtë” do ta ngrejnë trofeun pas ndeshjes së fundit të sezonit ndaj rivalëve të Crystal Palace F.C. më 24 maj në “Selhurst Park”, duke festuar titullin e parë që nga sezoni 2004-2005.
Mesfushori Declan Rice reagoi në rrjetet sociale me një foto festimi së bashku me shokët e skuadrës, duke shkruar: “Jua thashë të gjithëve… mbaroi”.
Barazimi i City-t mund të shënojë gjithashtu fundin e një epoke për Guardiolën, i cili nuk i mohoi zërat për një largim të mundshëm në fund të sezonit.
Tifozët e Arsenalit festuan gjatë jashtë stadiumit “Emirates”, duke ndezur flakadanë dhe duke mbushur rrugët e Londrës me festë. Festime pati edhe në qendrën stërvitore të klubit, ku lojtarët ndoqën së bashku ndeshjen e City-t.
Nën drejtimin e trajnerit Mikel Arteta, Arsenali rikthehet në majën e futbollit anglez dhe bashkohet me brezin legjendar të emrave si Thierry Henry, Dennis Bergkamp dhe Ian Wright.
Ky sukses vjen pas tri sezonesh radhazi ku Arsenali e mbylli kampionatin në vendin e dytë, duke humbur garën për titull në javët e fundit.
Arsenali ka fituar të gjitha ndeshjet e fundit të sezonit, ndërsa City humbi pikë vendimtare ndaj Evertonit dhe Bournemouth-it, duke i hapur rrugën triumfit londinezëve.
Ky është titulli i 14-të kampion për Arsenal F.C. dhe i pari që nga ekipi legjendar i “Invincibles” të vitit 2004, i cili e mbylli sezonin pa asnjë humbje.
