Kongresmenia republikane amerikane Jackie Walorski vdiq të mërkurën në një aksident automobilistik pranë Elkhart, Indiana së bashku me dy anëtarë të stafit të saj dhe drejtuesin e automjetit tjetër.
Republikania nga Indiana ishte anëtarja më e lartë e Komitetit të Etikës në Dhomën e Përfaqësuesve.
Sipas Zyrës së Sherifit të Qarkut Elkhart, e cila iu përgjigj një telefonate rreth orës 12:30 me kohën lokale, Walorski dhe punonjësit e saj vdiqën si pasojë e plagëve të tyre.
Po kështu në vendin e ngjarjes ndërroi jetë edhe drejtuesi i mjetit tjetër. Walorski, 58 vjeç, shoqërohej nga 27-vjeçarja Zachery Potts nga Indiana dhe 28-vjeçarja Emma Thomson, nga Washington DC. Drejtuesi i mjetit tjetër u identifikua si 56-vjeçarja Edith Schmucker, nga Nappanee aty pranë.
Pak para orës 16:00 të së mërkurës, zyra e Walorski-t lëshoi një deklaratë se burri i saj Dean Swihart ishte informuar për vdekjen e saj.
“Sot, ne humbëm një nga anëtarët tanë më të mëdhenj. Jackie Walorski jetoi një jetë në shërbim publik dhe ishte një mike me të gjithë ata që e njihnin.” – shkroi në Twitter Komiteti Republikan.
Megjithëse Dhoma e Përfaqësuesve është e ndarë ashpër sipas linjave partiake, shumë demokratë gjithashtu i dërguan mesazhe ngushëllimi Walorskit, familjes së saj dhe familjeve të punonjësve të saj.
Ajo është anëtarja e tretë e Dhomës që vdes në detyrë këtë vit. Në shkurt, Kongresmani republikan Jim Hagedorn (Minnesota) vdiq nga kanceri në veshka në moshën 59-vjeçare. Muajin pasues, Kongresmeni republikan Don Young (Alaska) vdiq në një fluturim nga Los Angeles në Seattle, në moshën 88.
