Kryetari i Partisë Demokratike Lulzim Basha ka reaguar pas arrestimit të ish-ministrit të Mjedisit Lefter Koka nga SPAK, lidhur me çështjen e inceneratorëve.
Basha thotë se ky arrestim tregon se akuzat e vazhdueshme të PD-së kanë qenë të drejta, por nuk e quan drejtësi të plotë arrestimin vetëm të Kokës për këtë çështje. Kjo pasi sipas tij nuk është Koka “peshku i madh” për këtë aferë.
“Arrestimi i sotëm i ish-ministrit të Edi Ramës, Lefter Koka është një tjetër provë që fakton drejtësinë e denoncimeve të PD-së. Sot është dita të kujtojmë se ishte PD ajo që në shkurt të 2018-ës nisi procesin e denoncimeve dhe të interpelancave parlamentare, përkundër gjithë zhurmnajës, blerjes së heshtjes publike duke përfshirë edhe influencimin përmes parave të inceneratorëve të pothuajse të gjitha medieve shqiptare për 400 milionë Euro që u janë zhvatur taksapaguesve shqiptarë. E pra sot, arrestimi i ministrit të Ramës provon se akuzat tona kanë qenë të drejta, se denoncimet tona kanë qenë të bazuara.
Thënë kjo, nuk ka qytetar shqiptar ta besojë se ky është ‘peshku i madh’. E dinë të gjithë që 17 vendime qeverie brenda dite nuk i nxirrte dot një ministër, kushdo qoftë ky.
Emrat e vërtetë që qëndrojnë pas kësaj afere me 400 milionë Euro janë ato të Edi Ramës, Damian Gjiknurit, Erion Veliajt, Klodian Mërtirit, Arben Ahmetajt dhe surrogatëve të tjerë, dy kryetarëve të tjerë të bashkive të tjera.
Dhe sa kohë nuk ka veprim të plotë, nuk ka drejtësi të plotë për këtë aferë të tmerrshme korruptive që ka varfëruar edhe më shumë xhepat e shqiptarëve.
Ndaj nuk mund të themi se sot është një ditë triumfi, për drejtësinë. Është ndoshta fillimi i një procesi, por që nuk mund të përfundojë pa i dhënë përgjigje pyetjeve se çfarë bëhet me kokat e kësaj afere, me kreun e qeverisë që kaloi 17 vendime qeverie brenda një dite. Paratë e kujt po pastronte ministri i Ramës që është arrestuar sot?
Kjo dëshmon edhe njëherë rëndësinë që ka komisioni hetimor për inceneratorët, dëshmon edhe njëherë rezistencën, arsyet për rezistencë që iu bë ngritje së këtij komisioni dhe rikthen vëmendjen e qytetarëve faktin që ne, Partia Demokratike po e bëjmë këtë betejë për interesat e shqiptarëve, për xhepat e shqiptarëve, në krahun e shqiptarëve, por po tregohet qartë që me refuzimin për t’ju përgjigjur në kohë me dokumentacionin e kërkuar dhe me dëshmitarët e kërkuar fajtorët janë vetëzbuluar para opinionit publik.
Ky është momenti për t’i thënë çdo shqiptari që Komisioni Hetimor për Inceneratorët dhe beteja e nisur që në shkurt të vitit 2018, madje që në 2017 për denoncimin e kësaj skeme mafioze, kjo betejë do të vazhdojë dhe se pavarësisht prej vullnetit të plotë apo jo të drejtësisë të cilës i kërkoj sot të veprojë pa hezitim për të vënë para përgjegjësisë të gjithë duke filluar nga kokat dhe jo duke u kënaqur vetëm me 1, 2 apo 3 pjesëmarrës në këtë skemë gjigande korrupsioni. Pavarësisht nga gjithë kjo Partia Demokratike, deputetët tanë në komisionin e hetimit për inceneratorët do të vijojnë betejën tonë për transparencën pikërisht në funksion të zbardhjes së kësaj skeme gjigande kriminale që nga njëra anë ka rënduar qytetarët sepse ju të gjithë e dini që qytetarëve dhe bizneseve, taksat e pastrimit u janë rritur e ju janë shtuar. E dini fare mirë se kjo nuk ka sjellë as cilësi më të mirë ajri, asnjë higjenë më të madhe në qytetet tona.
Përkundrazi, ka sjellë ndotje më të mëdha sepse e gjithë skema e inceneratorëve është një skemë mafioze e ndërtuar për të vjedhur shqiptarët dhe për të dëmtuar shëndetin e tyre. Nuk mund të mos e shpreh se ky hap i parë i ndërmarrë sot padiskutim është i mirëpritur, por nga ana tjetër dua ta them fare qartë në emër të Partisë Demokratike se pa shkuar tek peshqit e mëdhenj të kësaj afere, gjithçka do të mbetet një farsë dhe në vend që të ndërtojë rrezikon që të rrënojë besimin e drejtësisë. Ndaj, e nxis drejtësinë në këtë ditë kur ka hedhur këtë hap të marrë të mos ndalet me kaq, mos ta fusë për kalendar greke siç i thonë procesin e hetimit, por të shkojë menjëherë tek autorët që e kanë bërë të mundur siç e thashë firmosjen e 17 akteve qeveritare me një ditë.
Sot është dita kur Lefter Koka është arrestuar, që Edi Rama, Ëngjëll Agaçi, Damian Gjiknuri, Srben Ahmetaj, së bashku me Klodian Mërtirin, Erion Veliajn dhe kryetarët e dy bashkive të tjera të thërriten dhe të merren urgjentisht sipas ligjit, të procedohen sipas ligjit, sepse pa ta Lefter Koka, sigurisht që nuk do të arrinte dot të kryente këtë vepër monstruoze dhe këtë krim të rëndë mbi xhepat e shqiptarëve.”– deklaroi Basha.
Ky reagim i Bashës vjen pasi ish-ministri i Mjedisit Lefter Koka është arrestuar paraditen e sotme nga policia pas urdhrit të SPAK. Arrestimi i tij ka të bëjë me çështjen e incineratorëve.
Urdhri për arrestimin e Kokës është firmosur nga prokurori Klodian Braho e është firmosur nga gjykatësi Erion Bani. Ish-ministri akuzohet për “shpërdorim detyre, pastrim parash e korrupsion”.
