Emiratet e Bashkuara Arabe thanë të martën se gjashtë dronë ishin lëshuar kundër tyre nga Iraku gjatë 48 orëve të fundit, përfshirë një që shkaktoi zjarr në një central bërthamor në shtetin e Gjirit të dielën.
Ministria e Mbrojtjes e Emirateve tha në një deklaratë se kishte interceptuar të gjithë dronët, përveç njërit. Ajo shtoi se në total tre dronë kishin në shënjestër Centralin Bërthamor Barakah, i cili është centrali i parë komercial bërthamor në botën arabe.
Ministria tha se droni që depërtoi mbrojtjen ajrore të Emirateve goditi një gjenerator elektrik jashtë perimetrit të brendshëm të centralit.
Pas atij sulmi me dron, Autoriteti Federal për Rregullimin Bërthamor i Emirateve të Bashkuara Arabe deklaroi se centrali mbeti i sigurt dhe se nuk pati rrjedhje të materialeve radioaktive si pasojë e sulmit.
Zyrtarët emiratas kanë deklaruar se Emiratet e Bashkuara Arabe kanë të drejtën e plotë të reagojnë ndaj “sulmeve terroriste” të tilla.
Më vonë, në Kombet e Bashkuara në Nju Jork, ambasadori i Emirateve të Bashkuara Arabe në OKB, Mohamed Abushahab, i tha një mbledhjeje të Këshillit të Sigurimit të thirrur për të diskutuar sulmin ndaj centralit Barakah se ky nuk ishte një incident i izoluar, përcjell Reuters.
Ai nuk identifikoi autorin e sulmit, por tha se ai ndodhi “në një kontekst më të gjerë rajonal, ku sulmet e vazhdueshme ndërkufitare nga një shtet dhe grupet e tij të mbështetura kanë shtyrë rajonin drejt përshkallëzimit më të madh dhe një përballjeje të rrezikshme.”
