Hetuesit gjermanë kanë zbuluar gjurmë eksplozivi në jahtin ‘Andromeda’ të dyshuar për sabotimin e Nord Stream shtatorin e kaluar, ka raportuar New York Times.
Informacioni erdhi nga tre zyrtarë gjermanë të paidentifikuar, pohoi gazeta në një shkrim të premten.
Të njëjtat burime pohuan se dy nga gjashtë anëtarët e ekuipazhit kishin përdorur pasaporta false bullgare gjatë operacionit të supozuar kundër tubacioneve të gazit.
Në fillim të marsit, Times kishte raportuar, duke cituar zyrtarë amerikanë, se një ‘grup pro-ukrainas’ mund të ketë qenë pas sulmit që çaktivizoi tubacionet Nord Stream 1 dhe 2, të cilat u ndërtuan për të shpërndarë gazin rus në Evropë përmes Gjermanisë. Burimet anonime të gazetës theksuan se ‘asnjë shtetas amerikan apo britanik nuk ishte i përfshirë’ në sabotimin e infrastrukturës kryesore të energjisë.
Mjeti lundrues, i cili dyshohet se ishte marrë me qira nga autorët për të kryer sulmin, u identifikua shpejt si jahti ‘Andromeda’.
Sekretari i shtypit i Kremlinit Dmitry Peskov sugjeroi më herët se shkrimet në lidhje me përfshirjen e ‘Andromedës’ u shpërndanë nga mediat perëndimore me qëllim që të largonin vëmendjen nga raporti i gazetarit investigativ veteran amerikan Seymour Hersh, i cili erdhi pak para raporteve të mediave perëndimore dhe fajësoi Uashingtonin për sabotazhin.
Sipas një burimi të informuar që bisedoi me Hersh, eksplozivët u vendosën në tubacionet në Detin Baltik në qershor 2022 nga zhytësit e marinës amerikane gjatë një stërvitje të NATO-s dhe u shpërthyen nga distanca dy muaj më vonë me urdhër të presidentit amerikan Joe Biden. Shtëpia e Bardhë i ka hedhur poshtë si ‘trillim krejtësisht të rremë dhe të plotë’ gjetjet e gazetarit fitues të çmimit Pulitzer.
Në raportin e saj të premten, NYT citoi gjithashtu Johannes Riber, një oficer detar dhe analist në Institutin për Strategjinë dhe Studimet e Luftës në Danimarkë, i cili gjithashtu vuri në dyshim pretendimet se një jaht 15 metra ishte në gjendje të kryente një sulm të një shkallë e tillë, duke i krahasuar ato me një teori ‘James Bond’.
