Dy burra janë dënuar me burgim të përjetshëm në Indi për një vrasje të vitit 2014, e cila thuhet se u zbulua pjesërisht falë papagallit të përkëdhelur të gruas së vdekur, e cila besohet të ketë qenë dëshmitare e vrasjes.
Gjyqtari special Mohammed Rashid dënoi Ashu Sharma dhe Ronnie Massey me burgim të përjetshëm plus një gjobë prej 72,000 rupish (874 dollarë) të enjten bazuar në provat e mbledhura pasi Sharma rrëfeu se kishte vrarë tezen e tij, Neelam Sharma, me ndihmën e mikut të tij.
Dyshja hynë në shtëpinë e viktimës në Agra më 20 shkurt 2014, kur burri i saj ishte larguar, bashkë më fëmijët e çiftit.
Ata e goditën me thikë 14 herë viktimën dhe madje e therën nëntë herë qenin e saj të përkëdhelur, tha vajza e Neelam, Nivedita Sharma për India Today. Kushëriri i saj kishte ndërmend të ‘vriste dhe plaçkiste’, shpjegoi ajo, pasi ai e dinte se ku i ruanin paratë dhe bizhuteritë e tyre, pasi kishte vizituar shumë herë shtëpinë e tezes dhe madje kishte qëndruar atje për vite me rradhë.
Babai i saj Vijay madje i kishte dhënë nipit të tij 80,000 rupi (972 dollarë) për një diplomë.
Vijay Sharma u kthye nga dasma për të gjetur kufomat e gruas së tij dhe qenit të saj dhe thuhet se u bë ‘dyshuese’ pasi papagalli i përkëdhelur i familjes ndaloi të hante, pinte dhe fliste.
Duke besuar se zogu mund të ketë qenë dëshmitar i vrasjes, ai lexoi një listë të të dyshuarve përpara tij. Kur arriti te nipi i tij Ashu, zogu reagoi ashpër, duke bërtitur me tmerr emrin e tij – një sjellje që dyshohet se e përsëriti para policisë. Ata arrestuan më pas Ashun, megjithëse papagalli nuk u paraqit kurrë si provë gjatë prokurorisë për shkak të një teknike ligjore.
Zogu nuk jetoi për të parë drejtësinë e vënë në vend, pasi ngordhi gjashtë muaj pas pronares së tij. Burri i Neelam, Vijay Sharma, gjithashtu ka vdekur që atëherë, në nëntor 2020.
Vajza e tyre pohoi se çifti nuk do ishte i kënaqur me dënimin, duke thënë për India Today, ‘prindërit e mi donin që Ashu të varej dhe e gjithë familja do kërkonte në Gjykatën e Lartë për ta dënuar atë’.
