Të paktën 18 persona, mes tyre 10 fëmijë dhe pesë gra, humbën jetën dhe 35 të tjerë mbetën të plagosur pasi një kamion që transportonte refugjatë afganë të kthyer nga Pakistani u përmbys në një autostradë kryesore në lindje të Afganistanit, përcjell Euronews.
Aksidenti ndodhi të shtunën në aksin rrugor që lidh kryeqytetin Kabul me qytetin Jalalabad, në provincën Nangarhar Province. Sipas autoriteteve lokale, të plagosurit u dërguan me urgjencë në spitalet e zonës për trajtim mjekësor.
Zëdhënësi i qeverisë talebane, Zabihullah Mujahid, shprehu trishtim për ngjarjen, e cila ndodhi në përfundim të festës myslimane të Eid al-Adha, duke u shprehur ngushëllime familjeve të viktimave.
Aksidentet rrugore me pasoja të rënda janë të shpeshta në Afganistan, për shkak të infrastrukturës së dëmtuar, mungesës së mirëmbajtjes së rrugëve, shkeljes së rregullave të qarkullimit dhe drejtimit të pakujdesshëm.
Pasagjerët në kamion ishin pjesë e valës së madhe të afganëve që po kthehen nga Pakistani, pas masave të ashpra të autoriteteve në Islamabad që kanë çuar në dëbimin ose largimin e qindra mijëra emigrantëve pa dokumente. Në të njëjtën periudhë, edhe Irani ka intensifikuar dëbimet e afganëve.
Sipas të dhënave të Komisariatit të Lartë të Kombeve të Bashkuara për Refugjatët (UNHCR) dhe Organizatës Ndërkombëtare për Migracionin (IOM), rreth 447 mijë afganë janë kthyer nga Pakistani vetëm këtë vit. Shumë prej tyre, përfshirë persona të lindur dhe rritur atje, janë detyruar të udhëtojnë me kamionë të ngarkuar me sendet e tyre personale.
Ngjarja vjen pas një tjetër aksidenti tragjik të regjistruar më herët në Afganistanin perëndimor, ku një autobus me emigrantë të kthyer nga Irani u përplas me dy mjete të tjera, duke lënë 78 të vdekur, mes tyre 19 fëmijë.
