Rreth 8,000 persona marshuan nëpër qendër të kryeqytetit koreano-jugor, Seul, të shtunën, pavarësisht paralajmërimit të kryeministrit se tubimi do të shkaktojë një rritje në rastet Covid-19.
Sindikatat kishin planifikuar të mbanin një tubim në Yeouido, në Seulin perëndimor, por ata vendosën të mblidheshin në një vend të ri pasi policia u përpoq t’i bllokonte.
“Ne jemi mbledhur këtu për të mbrojtur jetën dhe punësimin e sigurt të punëtorëve.” – tha shefi i Sindikatës Yang Kyung-soo gjatë tubimit, i cili zgjati për rreth dy orë, sipas agjencisë së lajmeve Yonhap.
Anëtarët e sindikatës kërkuan që të ndërpriten shkurtimet e vendeve të punës, të rritet paga minimale dhe të rritet mbështetja për punëtorët e prekur nga bllokimet e Covid-19.
Të enjten, qeveria e Koresë së Jugut shtyu për të paktën një javë planin e saj për të hequr disa nga kufizimet që kanë të bëjnë me pandeminë.
Kryeministri Kim Boo-kyum u bëri thirrje sindikatave të shtyjnë tubimin për shkak të kufizimeve të Covid-19 dhe kërcënoi protestuesit me veprime ligjore nëse ata nuk bindeshin.
