Marrëveshja për njohjen e ndërsjellë të lejeve të drejtimit mes Shqipërisë dhe Italisë në shtetin përtej Adriatikut do hyjë në fuqi më datë 12 korrik.
Ministria për Evropën dhe Punët e jashtme ka njoftuar se kanë përfunduar procedurat e brendshme në Itali dhe hyrja në fuqi është fiksuar data 12 korrik.
“Ministria për Evropën dhe Punët e Jashtme njofton se kanë përfunduar tërësisht procedurat e brendshme nga pala italiane lidhur me marrëveshjen për njohjen e ndërsjellë të lejeve të drejtimit mes Shqipërisë dhe Italisë.
Kjo marrëveshje do të hyjë në fuqi pas 60 ditësh, më konkretisht më datë 12 korrik 2021.
Marrëveshja për njohjen e ndërsjellë të lejeve të drejtimit mes dy vendeve u dakordësua më 12 mars gjatë vizitës së Ministres për Evropën dhe Punët e Jashtme, Olta Xhaçka, në Itali.
Ndërsa më datë 18 mars, marrëveshja u firmos në Tiranë mes Ministres Xhaçka dhe Ambasadorit italian në Shqipëri, Fabrizio Bucci”-thuhet në njoftim.
