Vendosni fjalën kyçe....

“El Mejor”, hollësitë e operacionit në Portin e Durrësit ku u kapën 143 kilogramë kokainë (Video)


Një sasi prej 143 kilogramësh kokainë u kap mëngjesin e sotën në Portin e Durrësit. Sasia e drogës ishte fshehur në tavanin e një konteineri me me banane që kishte ardhur nga Ekuadori.

Ai kishte përshkuar itinerarin Ekuador-Itali-Shqipëri ndërsa ngarkesa ma banane ishte porositur nga kompania Masabi Fruits me qendër në Kombinat.

Dy administratorët e kompanisë janë ndaluar nga policia. Në një deklaratë pak më herët, njëri prej tyre, Erion Peti deklaroi se nuk ka asnjë lidhje me drogën e kapur dhe se operonte prej 5 vitesh në treg duke porositur fruta nga Amerika e Jugut dhe se nuk kishte pasur kurrë probleme.

Ai shtoi se ndihej i pambrojtur dhe se ishte i gatshëm të bashkëpunonte me drejtësinë.

Kjo është sasi e dytë më e madhe e drogës e kapur në Portin e Durrësit pas 613 kilogramëve kokainë të kapura në vitin 2018, për të cilën është dënuar me burg Arbër Çekaj.

Njoftimi

“Vijojnë goditjet e njëpasnjëshme ndaj veprimtarisë kriminale të trafikimit të drogave të forta.

Finalizohet operacioni​ policor i koduar “EL MEJOR”.

Operacioni i zhvilluar nga Drejtoria Vendore e Policisë Durrës dhe Drejtoria Vendore e Kufirit​, me mbështetjen e Drejtorisë së Përgjithshme të Policisë së Shtetit, në bashkëpunim me strukturat doganore dhe autoritetin portual Durrës.

Hetimet po drejtohen nga prokurorë të Prokurorisë së Rrethit Gjyqësor Durrës dhe prokurorë të SPAK-ut.

Sekuestrohen rreth 143 kilogramë lëndë e dyshuar narkotike kokainë.

Arrestohen në flagrancë 2 administratorët e kompanisë pritëse të ngarkesës me banane.

Strukturat e Policisë së Shtetit, në vijim të punës për parandalimin, evidentimin dhe goditjen e trafikimit të lëndëve narkotike, bazuar në informacionet e marra në rrugë operative dhe hetimet e kryera se në një kontenier fshihej një sasi e konsiderueshme lënde narkotike kokainë, në bashkëpunim me autoritetet doganore​ dhe portuale, kanë organizuar punën dhe kanë finalizuar operacionin policor të koduar “EL MEJOR”.

Si rezultat i operacionit, gjatë kontrollit të imtësishëm të ushtruar në një kontenier të ngarkuar me banane, i cili ishte nisur nga porti i GUAYAQUIL në Ekuador dhe kishte kaluar tranzit në portin “GIOIA TAURO”, Itali​, me destinacion Shqipërinë, për llogari të një firme me qendër në Tiranë, me administratorë shtetasit E. P. dhe K. X., shërbimet policore dhe ato doganore gjetën të fshehura në tavanin e kontenierit​, pako të mbushura me lëndë narkotike të dyshuar kokainë me peshë totale 143 kilogramë.

Në vijim të veprimeve, nga Seksioni për Hetimin e Narkotikëve në DVP Durrës u arrestuan në flagrancë shtetasit K. X., 30 vjeç dhe E. P., 42 vjeç, të dy banues në Tiranë.

Nën drejtimin e Prokurorisë së Rrethit Gjyqësor Durrës vijon puna për dokumentimin e plotë të kësaj veprimtarie kriminale dhe kapjen e autorëve të tjerë të përfshirë në këtë veprimtari kriminale.

Materialet i kaluan Prokurorisë së Rrethit Gjyqësor Durrës, për veprime të mëtejshme.”