Kreu i Partisë Demokratike, Lulzim Basha, ka reaguar lidhur me lajmin për shërimin e mjekut Dhimitër Kraja.
Ai thotë se ky është një lajm i gëzueshëm dhe se të gjitha mendimet dhe lutjet e tij shkojnë për personelin mjekësor që po rrezikojnë jetën çdo duke iu shërbyer qytetarëve.
Basha bën thirrje për transparencë dhe të shtohen testimet për identifikimin e të prekurve nga koronavirusi.
“Është një lajm i gëzuar për mua personalisht dhe për çdo bashkëqytetar shërimi i Prof. Dhimitër Krajës.
Mendimet dhe lutjet tona shkojnë për të gjithë personelin mjekësor që po përballet sot me COVID-19. Për të gjithë ata mjekë, laborantë, infermierë, sanitarë e shoferë ambulancash që rrezikojnë çdo ditë jetët e tyre në shërbim të qytetarëve. Në këto ditë të vështira ata meritojnë angazhimin serioz të qeverisë për të siguruar të gjitha mjetet e nevojshme mbrojtëse për ekipet mjekësore.
Transparenca është garanci dhe siguri si për stafet mjekësore ashtu dhe për të gjithë qytetarët. Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit.
Prandaj sa nuk është vonë qeveria duhet të zbatojë korrektësisht kërkesën standarte të OBSH: rritjen e numrit të testimeve.
Çdo shmangie nga kërkesat e përsëritura nga OBSH është papërgjegjshmëri e rëndë që jo vetëm fsheh të vërtetën por kushton shtrenjtë: Sa më pak testime, aq më pak persona të identifikuar, aq më gjatë shumë zgjatet zinxhiri i infeksionit, aq më gjatë vazhdon karantina dhe thellohet kriza ekonomike.” – shkruan Basha.
Duhet vepruar sot, çdo ditë e humbur na kushton jetë dhe shëndet!
Me shërimin e doktor Krajës, numri i mjekëve dhe infermierëve të shëruar në vendin tonë deri më tani ka shkuar në 18.