Gjykata e Apelit ka caktuar seancën për ish- ministrin e Brendshëm Saimir Tahiri në datën 9 prill.
Seanca do të mbahet në orën 10:30 dhe siç e parashikojnë masat e marra nga qeveria për frenimin e përhapjes së koronavirusit, seanca do të bëhet pa praninë e publikut apo mediave.
Bashkë me ish-ministrin, seanca do të jetë dhe për Drejtorin e Përgjithshëm të Policisë së Vlorës, Jaed Çela.
Kujtojmë se vitin e kaluar, ish-ministri Saimir Tahiri u dënua për shpërdorim detyre me 5 vite burg të konvertuara me gjykim të shkurtuar në 3.4 vite shërbim prove. Por Prokuroria e apeloi çështjen pasi kërkonte 12 vite burg për Tahirin për 3 vepra penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.
Po ashtu edhe Tahiri e apeloi pasi pretendonte pafajësinë edhe për akuzën për “shpërdorim detyre”.
