Prokurori Arjan Ndoji ka dalë nga reanimacioni në spitalin Rajonal të Durrësit dhe është transferuar në një prej dhomave të pavionit.
Ndoji mori 2 plumba në atentatin e djeshëm në mbikalimin e Shkozetit dhe për pasojë pati dëmtime të klavikulës.
Mësohet se prokurori është takuar me familjarët e tij, të cilët kanë qenë në ankth për orë të tëra.
Në spital në një dhomë tjetër ndodhet edhe miku i Ndojit, Pëllumb Muharremi, i cili njihet si person problematik nga policia.
Ndërkohë shoferi, i cili ndodhet në spitalin e Traumës në Tiranë vijon ende në gjendje kritike për jetën. Orët në vijim janë vendimtare për Andi Malokun, i cili ka marrë dëmtime në dy anët e mushkërive dhe në pjesën e shtyllës kurrizore, për shkak të së cilës në rastin më të mirë rrezikon të mbetet i paralizuar.
