“Jelekët e Verdhë” kanë dalë sërish në rrugët e Parisit, kësaj here për të nderuar ata që janë plagosur gjatë muajve të demonstratave dhe për të dënuar policinë për përdorimin e predhave të gomës.
Rreth 14 mijë protestues njerëz u mblodhën në kryeqytetin francez dhe marshuan për të dënuar dhunën e forcave të rendit
Disa prej atyre që marshonin përmes kryeqytetit francez shfaqnin plagët e lëndimeve të tyre, mes të cilëve ishte edhe një prej organizatorëve të lëvizjes, Jerome Rodrigues, i cili mbulonte syrin e tij të plagosur.
Zyrtarët vlerësojnë se të paktën 1,900 protestues janë plagosur që kur protestat filluan më 17 nëntor.
Këshilli i Shtetit vendosi të premten se forcat e sigurisë kanë të drejtën të përdorin predhat, pasi Liga Franceze e të Drejtave të Njeriut dhe sindikatat kërkuan që ato të ndalohen.
Një numër gazetarësh janë plagosur duke raportuar demonstratat dhe të paktën 17 vetë kanë pësuar dëmtime të rënda në sy.
