Një burrë drejtoi një makinë drejt një turme njerëzish në qytetin verior italian të Modenës, duke plagosur të paktën tetë persona, katër prej të cilëve janë në gjendje të rëndë, tha policia.
Shoferi, një 30-vjeçar i lindur në Bergamo dhe me origjinë nga Afrika e Veriut, i cili ishte zhvendosur në provincën që përfshin Modenën u përpoq të ikte pasi makina u përplas me një vitrinë dyqani, tha kryebashkiaku i Modenës për RaiNews24.
Shoferi që po ikte u ndalua nga disa këmbësorë, njërin prej të cilëve e sulmoi me thikë dhe e plagosi lehtë. Shoferi u arrestua më vonë nga policia.
Shoferi po merrte trajtim për çrregullime psikiatrike, tha një burim në Ministrinë e Brendshme, pa dhënë detaje mbi motivet e burrit apo nëse terrorizmi ishte një faktor, shkruan Reuters.
Midis të plagosurve, katër ishin në gjendje të rëndë dhe dy u transportuan me helikopter në një spital në Bolonja, rreth 40 kilometra nga Modena, tha për RaiNews24 kryebashkiaku i qytetit, Massimo Mezzetti.
“Shpreh solidaritetin tim me ata që u plagosën dhe familjet e tyre”, shkroi kryeministrja Giorgia Meloni në platformën e mediave sociale X.
“Ajo që ndodhi në Modena është jashtëzakonisht serioze. Unë besoj se personi përgjegjës do të mbahet plotësisht përgjegjës për veprimet e tij”, shtoi ajo.
