Një operacion dramatik shpëtimi, që po konsiderohet si një garë e ethshme me kohën, po zhvillohet në territorin iranian. Forcat speciale amerikane, të mbështetura nga ajri, janë vënë në kërkim të navigatorit të një gjuajtësi F-15E, i cili u rrëzua të premten në vargmalet e thyer të Zagrosit.
Situata është tejet e tensionuar, pasi në kërkim të ushtarakut amerikan janë vënë edhe forcat e Republikës Islamike, të cilat kanë premtuar një shpërblim prej rreth 66 mijë dollarësh për këdo që e kap atë të gjallë. Rajoni ku mendohet se ndodhet navigatori, provinca Kohgiluyeh dhe Boyer-Ahmad, njihet për terrenin e egër dhe si zemra e rezervave të naftës në Iran.
Ndërsa piloti i avionit është shpëtuar me sukses nën breshërinë e zjarrit, fati i navigatorit mbetet i paqartë. Ekspertët ushtarakë druhen se një kapje e mundshme e tij nga Irani do të shërbente si mjet presioni ndaj administratës Trump në negociatat e luftës, përcjell Ynet.
“Përshkrimi i këtij misioni si rrëqethës dhe jashtëzakonisht i rrezikshëm do të ishte pak. Kjo është ajo për të cilën ata stërviten në mbarë botën. Ata njihen si ‘thika zvicerane’ e Forcave Ajrore,” — deklaroi për mediat një ish-komandant i skuadronit të shpëtimit.
Nga ana tjetër, Presidenti Donald Trump është shprehur se rrëzimi i mjetit fluturues nuk do të ndikojë në negociatat me Iranin, por presioni publik po rritet, sidomos pas raportimeve për 13 viktima amerikane deri tani në këtë konflikt.
Incidenti konsiderohet si një goditje për prestigjin ushtarak të SHBA-së, pasi vjen pak ditë pasi Sekretari i Mbrojtjes, Pete Hegseth, deklaroi se SHBA ka arritur superioritet të plotë ajror mbi Iranin.
Ish-eksperti i operacioneve speciale të Marinës Amerikane, Jonathan Hackett, theksoi se prioriteti kryesor mbetet gjetja e shenjave të jetës.
“Ekipet punojnë mbrapsht nga vendndodhja e fundit e njohur dhe shpërndahen në bazë të distancës që individi mund të ketë përshkuar në atë terren,” — shpjegoi ai.
Në terren, operacioni po ndërlikohet nga prania e civilëve të armatosur dhe fiseve lokale që njohin çdo shteg të maleve. Analistët tërheqin paralelisht me ngjarjet e Mogadishusë në vitin 1993, ku një mision i ngjashëm u kthye në një tragjedi të përgjakshme.
“Misioni ynë është që të tjerët të mund të jetojnë,” — mbetet motoja e njësive elitë CSAR që po operojnë aktualisht në thellësi të territorit armik, duke rrezikuar gjithçka për të kthyer ushtarakun e tyre në shtëpi.
