Ashtu siç pati paralajmëruar, Lëvizja Bashkë mbajti sërish protestën kundër kullës që ka nisur të ndërtohet prapa Teatrit të Operës dhe Baletit, ndërkohë që vazhdon jehona për lidhjet e Foltores me ndërtimin e kësaj godine.
Nën sloganin ’Larg duart nga parku’, shumë qytetarë iu bashkuan kësaj proteste, të cilët u shprehen se SPAK duhet ta hetojë këtë aferë dhe se kulla është simbol i parasë së dyshimtë.
“Është e mira ta ndalojmë, pa zërin tuaj asgjë nuk arrihet”, tha një qytetar që mori fjalën.
Ndërkohë Partia Demokratike depozitoi sot në SPAK dosjen për kullën “Mali i Tiranës”. Padia u dorëzua nga kryetarja e grupit të këshilltarëve të PD-së në këshillin bashkiak të Tiranës. Më herët, Basha hodhi dyshimin se përfitues të kullës, janë edhe anëtarë të Rithemelimit, duke thënë se kasta 33-vjeçare e politikës është bashkë.
Ditën e djeshme, Berisha tentoi të shuante zërat për “shitjen” e opozitës te kulla, duke mos e cilësuar shumë të rëndësishme atë që për shqiptarët është shqetësimi i momentit, kthimin e lulishtes në shesh ndërtimi.
Kundër qëndrimit të Berishës, doli edhe ish bashkëpunëtorja e tij, Evi Kokalari, e cila i quan faktet e padiskutueshme për përfshirjen e kreut të foltores me ortakët e tij biznesmenë në ndërtimin e kullës. Sipas saj ky projekt shumë i madh është bërë në kurriz të demokratëve, duke shitur jo vetëm zgjedhjet e 14 majit, por edhe të vitit 2025.
