Izraeli nisi sulmet ajrore duke synuar vendet e supozuara të prodhimit dhe ruajtjes së armëve në Gaza të enjten, pas një sulmi me raketa nga enklava bregdetare, thanë Forcat e Mbrojtjes të Izraelit (IDF), sipas CNN.
Në një deklaratë, IDF tha se “avionët luftarakë goditën një vend të prodhimit të armëve” në Gaza qendrore në pronësi të Hamasit, grupit militant palestinez që drejton Gazën.
Paralelisht, u godit një kompleks ushtarak që i përkiste Organizatës Terroriste Hamas në Rripin verior të Gazës, i cili gjithashtu përdorej si një depo për ruajtjen e armëve detare, thuhet në deklaratë.
Më herët të enjten, IDF tha se pesë raketa të lëshuara nga Gaza në drejtim të territorit izraelit, duke përfshirë qytetet Ashkelon dhe Sderot, u kapën dhe një tjetër raketë ra në një zonë të hapur.
Sulmet ajrore vijnë pas vdekjes së të paktën 11 palestinezëve në Nablus në Bregun Perëndimor të pushtuar të mërkurën, që ndodhi gjatë një bastisjeje nga ushtria izraelite që la të paktën 500 të plagosur, thanë zyrtarët palestinezë të enjten. Një nga të vdekurit e shënjestruar në sulmin në Nablus ishte një anëtar i Hamasit dhe dy ishin komandantë të Xhihadit Islamik, thanë më herët dy grupet militante.
“Ekipet tona u përballën me 488 lëndime gjatë pushtimit të forcave pushtuese në Nablus, duke përfshirë 103 lëndime nga plumbat e vërtetë të dërguara në spitalet në Nablus”, tha Gjysmëhëna e Kuqe Palestineze. Lëndimet e tjera janë prej gazit lotsjellës dhe predhave, thanë ata
Bastisja në Nablus zgjati rreth katër orë dhe, në mënyrë të pazakontë, u zhvillua në mes të ditës, sepse IDF tha se kishte informacione se ku ndodheshin të dyshuarit. IDF i akuzoi ata se ishin përgjegjës për vdekjen e një ushtari izraelit dhe se përbënin një kërcënim të afërt.
Koordinatori special i Kombeve të Bashkuara për procesin e paqes në Lindjen e Mesme tha të mërkurën vonë se ai ishte “i tmerruar nga humbja e jetëve të civilëve” në sulm.
“Jam thellësisht i shqetësuar nga cikli i vazhdueshëm i dhunës,” tha Tor Wennesland në një deklaratë. “Unë u bëj thirrje të gjitha palëve të përmbahen nga hapat që mund të ndezin më tej një situatë tashmë të paqëndrueshme.”
