Ish-lojtari i kombëtares greke Vassilis Tsiartas është dënuar me 10 muaj burg me kusht, si dhe një gjobë prej 5,000 eurosh në një vendim të rrallë nga një gjykatë e Athinës, pasi u zbulua se kishte postuar një koment ‘transfobik’ në mediat sociale në vitin 2017.
Ish-lojtari i Sevillas e AEK-ut në Greqi, tashmë 49 vjeç, që ishte pjesë e Greqisë në triumfin në Euro2004, është zotuar të apelojë vendimin.
Ky është dënimi i parë sipas një rregulli të gjerë kundër racizmit që u ndryshua dhe u fut në ligjin grek dhe që ndëshkon nxitjen publike të dhunës ose urrejtjes në bazë të identitetit gjinor.
Vendimi rrjedh nga një postim në Facebook i Tsiartas në vitin 2017 ku ai shkruante se dëshironte që ‘ndryshimet e para të seksit të kryheshin mbi fëmijët e atyre që ratifikuan këtë neveri’.
Ai shtoi se gjykatat greke gjithashtu mund të ‘legjitimojnë pedofilët’.
Tsiartas gjithashtu shkroi në një postim pasues se ‘Zoti krijoi Adamin dhe Evën’.
Shoqata e Mbështetjes së Transgjinorëve të vendit (SYD) vuri në dukje se veprimi ligjor i ndërmarrë kundër Tsiartas ishte ‘veçanërisht i rëndësishëm për komunitetin transgjinor’.
Presidentja e SYD, Marina Galanou, e cila kohët e fundit ndërroi jetë, nisi një padi kundër Tsiartas bazuar në komentet e tij dhe deklaroi se misioni i saj ishte të luftonte çdo lloj racizmi, intolerance dhe dhunë ndaj anëtarëve të komunitetit LGBTQ.
