Një burrë u arrestua në Brazil pasi përplasi makinën përmes një turme mbështetësish të presidentit brazilian Jair Bolsonaro, duke plagosur nëntë persona.
Incidenti ndodhi pasditen e së mërkurës në autostradën ‘Uashington Luis’, sipas mediave kombëtare. Një grup njerëzish që protestonin kundër humbjes në zgjedhje të presidentit Bolsonaro po demonstronin në mes të rrugës.
Shoferi, i cili më pas u identifikua nga policia ushtarake shtetërore si një 28-vjeçar, i kërkoi turmës që ta linte të kalonte nëpër bllokadë, por nuk u pranua. Më pas ai i dha gaz mjetit e kaloi me makinë përmes turmës, duke plagosur nëntë prej tyre.
Automjeti u ndal menjëherë pas kësaj dhe oficerëve iu desh të mbronin shoferin nga demonstruesit e zemëruar që u përpoqën të hakmerreshin. Ai u arrestua, ndërsa nëna e tij 74-vjeçare, e cila ishte gjithashtu në makinë, u la e lirë.
I dyshuari përballet me akuzën për tentativë vrasjeje. Ai plagosi nëntë persona, duke përfshirë një vajzë 12-vjeçare dhe dy oficerë të zbatimit të ligjit, tha Policia Ushtarake në një deklaratë. Incidenti ndodhi në komunën Mirassol në shtetin e Sao Paulos, rreth 400 km në veriperëndim të kryeqytetit të provincës.
Protestat masive shpërthyen në Brazil pasi Bolsonaro pësoi një disfatë të ngushtë ndaj ish-presidentit Luiz Inacio Lula da Silva të dielën. Para zgjedhjeve, ai pretendoi se mund të humbiste vetëm nëse kishte manipulim dhe se ai kurrë nuk do e pranonte zyrtarisht humbjen. Protestuesit po kërkojnë një kontroll ushtarak të qeverisë dhe një hetim në sistemin elektronik të votimit të vendit.
Të mërkurën, Bolsonaro u kërkoi mbështetësve të tij që të mos bllokojnë autostradat federale, duke deklaruar se duke bërë kështu, ata vetëm po minonin legjitimitetin e lëvizjes së tyre. Ai u kërkoi atyre të mblidheshin në sheshe dhe vende të tjera të përshtatshme për mitingje.
