Autoritetet ruse në qytetin strategjik jugor të Ukrainës, Kherson, kanë shtyrë një referendum për bashkimin me Rusinë, për arsye sigurie.
“Kjo është duke u ndalur për shkak të situatës së sigurisë.”– tha Kirill Stremousov, nënkryetari i administratës së emëruar nga Rusia atje.
Ushtria ukrainase ka nisur një kundërofensivë në jug, ku Rusia planifikon të mbajë referendume në rajonet Kherson dhe Zaporizhzhia. Siç shkruan BBC, një urë kryesore në Kherson është sulmuar nga Ukraina. Duke folur në televizionin shtetëror rus, Stremousov tha se bombardimet ukrainase kishin dëmtuar Urën Antonovskiy në një masë të tillë që automjetet nuk mund ta kalonin më atë.
Ai tha se kamionët që transportonin civilë përtej lumit Dnieper ishin gjithashtu nën zjarrin ukrainas, siç ishte edhe infrastruktura e qytetit. Rusët janë mbështetur tek kjo urë për të sjellë trupa dhe pajisje në Kherson dhe jashtë saj.
Rusia ka njoftuar plane për të zhvilluar referendume në territorin e pushtuar, të ngjashëm me atë të mbajtur në Krime pasi trupat e saj pushtuan gadishullin në vitin 2014. Ukraina dhe aleatët e saj perëndimorë i kanë denoncuar planet e referendumit si të paligjshme.
Zëvendëskryeministrja e Ukrainës, Iryna Vereshchuk, u ka kërkuar civilëve të largohen nga Khersoni pasi luftimet intensifikohen në zonë. Ajo ka paralajmëruar gjithashtu se kushdo që merr pjesë në referendumin e planifikuar rus mund të përballet me ndjekjen penale të Ukrainës.
Pushtimi i Rusisë e ka destabilizuar jetën në Ukrainë në një masë të tillë, saqë nuk është e qartë se kush mund të votojë gjithsesi në referendume të tilla. Votimi i Krimesë në vitin 2014, i mbajtur nën okupimin ushtarak, nuk u njoh ndërkombëtarisht.
