‘Bordi i Qeverisjes së Dezinformimit’ i sapozbuluar, që vepron brenda Departamentit të Sigurisë Kombëtare të SHBA-së, ka shkaktuar një reagim masiv, duke detyruar shefin e DHS-së, Alejandro Mayorkas të bëjë disa paraqitje në TV kombëtar në një përpjekje për të sqaruar se si do të funksionojë njësia.
Shumë kritikë, duke përfshirë republikanët kryesorë, e kanë kritikuar nismën si një goditje ndaj fjalës së lirë, e ngjashme me ‘Ministrinë e së Vërtetës’ të marrë nga faqet e romanit distopian të George Orwell ‘1984’.
Duke folur në ‘State of the Union’ të CNN të dielën, Mayorkas hodhi poshtë kritikat duke pretenduar se policimi i mendimit është ‘pikërisht e kundërta e asaj që do të bëjë ky grup i vogël pune brenda Departamentit të Sigurisë Kombëtare’.
“Ajo që do të bëjë është të mbledhë së bashku praktikat më të mira në adresimin e kërcënimit të dezinformimit nga kundërshtarët shtetërorë të huaj, nga kartelet dhe të shpërndajë ato praktika më të mira te operatorët.” – shpjegoi ai, pasi Dana Bash i CNN tha se ende nuk ishte e qartë ‘si do të veprojë ky bord qeverisës’.
Shefi i DHS-së gjithashtu siguroi vazhdimisht amerikanët se njësia nuk ka absolutisht asnjë qëllim, ‘autoritet operacional’ ose ‘aftësi’ për të spiunuar qytetarët amerikanë.
Trupi i ri drejtohet nga Nina Jankowicz, rezymeja e së cilës përfshin punën me Ministrinë e Jashtme të Ukrainës dhe mbikëqyrjen e programeve të Rusisë dhe Bjellorusisë në grupin e lobit të Institutit Kombëtar Demokratik.
Kundërshtarët gjithashtu e kritikuan atë për hedhjen poshtë të historisë së laptopit të Hunter Biden të New York Post si një ‘ndërhyrje të ndikimit rus’ të rremë, histori që është verifikuar më pas nga mediat kryesore.
Në një paraqitje të veçantë në Fox News Sunday, Mayorkas mbrojti kualifikimet dhe objektivitetin e Jankowicz, duke e quajtur atë ‘shumë të kualifikuar’ dhe një ‘eksperte të njohur në fushën e dezinformimit’.
“Unë nuk e vë në dyshim objektivitetin e saj. Ka njerëz në departament që kanë një gamë të ndryshme pikëpamjesh dhe janë tepër të përkushtuar ndaj misionit. Ne nuk jemi policia e opinionit.”
Sekretarja e shtypit e Shtëpisë së Bardhë, Jen Psaki, u përpoq gjithashtu të nënvlerësonte nismën e ‘antidezinformimit’ si një ‘vazhdim të pretenduar të punës që filloi në Departamentin e Sigurisë Kombëtare në vitin 2020, nën ish-presidentin Trump’.
Shtytja e re e censurës u njoftua javën e shkuar, vetëm dy ditë pasi miliarderi Elon Musk arriti një marrëveshje për të blerë Twitter për 44 miliardë dollarë dhe u zotua të rivendoste lirinë e fjalës në platformë.
Përgatiti për Hashtag.al, K.Manjani
