Qeveria provinciale e Punjabit në Pakistan po vendos masa shtrënguese për të rritur numrin e qytetarëve që pranojnë të marrin vaksinën kundër Covid-19.
Gjatë një takimi të zyrtarëve të lartë civilë dhe ushtarakë të kryesuar nga Ministrja e Shëndetësisë e Punjabit, Yasmin Rashid, u bënë të ditura planet për të çaktivizuar kartat SIM të njerëzve që nuk pranojnë të marrin vaksinën.
Rashid tha se politika do të çaktivizonte kartat SIM që u përkisnin atyre që nuk arrijnë të vaksinohen “përtej një kohe të caktuar”.
“Ne po bëjmë gjithçka që mundemi për të detyruar njerëzit të vaksinohen … Qeveria nuk mund të lejojë që individët, të cilët nuk duan të vaksinohen, të rrezikojnë jetën e atyre që janë tashmë të vaksinuar.”- tha ministrja e shëndetësisë për gazetën “Express Tribune” të Pakistanit. Ajo tha se qeveria provinciale do të hartonte një afat kohor për zbatimin e këtij rregulli të ri sapo të merrte miratimin zyrtar nga Qendra Kombëtare e Komandës dhe Operacionit, e cila koordinon përgjigjen kombëtare të Pakistanit ndaj Covid-19.
Departamenti i Shëndetit Primar dhe Sekondar në Punjab njoftoi masën të enjten pas këtij takimi me ministren.
“Kartat SIM të njerëzve që nuk vaksinohen mund të bllokohen.”- shkroi departamenti në një postim në “Twitter”.
Mobile SIMS of people not getting vaccinated may be blocked, it was decided in Cabinet meeting under the chair of Minister for Health Dr. Yasmin Rashid at Civil Secretariat. The government will open walk-in vaccination of over 18 years of age group. pic.twitter.com/VXJWAWGzkd
— Primary & Secondary Healthcare Department Punjab (@PSHDept) June 10, 2021
Kjo u konfirmua më vonë edhe nga zëdhënësi i Departamentit të Specializuar të Shëndetësisë në Punjab, Syed Hammad Raza.
RT shkruan se përveç kufizimeve të kartës SIM, autoritetet mund të ndalojnë gjithashtu njerëzit e pa vaksinuar të shkojnë në parqe, restorante dhe qendra tregtare. Punjab është provinca më e populluar e Pakistanit, ku jeton më shumë se gjysma e popullsisë së përgjithshme të vendit.
