Vendosni fjalën kyçe....

“Gjatë një konflikti u vra Pjerin Xhuvani” – Deklarata zyrtare e policisë për krimin në Elbasan


Policia e Elbasanit ka dhënë njoftimin zyrtar lidhur me ngjarjen e rëndë në Elbasan mesditën e sotme ku mbeti i vrarë Pjerin Xhuvani dhe u plagosën disa persona të tjerë.

Sipas policisë, Xhuvani është vrarë me armë zjarri gjatë një konflikti ku mbetën të plagosur edhe tre persona me iniciale E.P, P.V. dhe E.B. si dhe efektivja e ‘Shqiponjave’, Xhensila Sota.

Njoftimi

Më datë 21.04.2021, rreth orës 14:00, në lagjen ‘5 Maji’, Elbasan, gjatë një konflikti është vrarë me armë zjarri shtetasi P. XH., si dhe janë plagosur shtetasit E. P., P. V. dhe E. B.

Gjithashtu, në përpjekje për të parandaluar krimin është plagosur edhe punonjësja e Policisë e forcës së posaçme ‘Shqiponjat’, XH. S.

Menjëherë në ndihmë të patrullës kanë shkuar shërbime të tjera të Drejtorisë Vendore dhe të Komisariatit të Policisë Elbasan, si dhe janë ngritur pika kontrolli në të gjitha akset rrugore në hyrje dhe dalje të qytetit të Elbasanit.

Gjithashtu, menjëherë është ngritur një grup i posaçëm hetimor i përbërë nga specialistë të hetimit të krimeve kundër personit në Drejtorinë Vendore të Policisë Elbasan, të Drejtorisë së Krimeve Kundër Personit e Pasurisë në Drejtorinë e Përgjithshme të Policisë së Shtetit dhe nën drejtimin e Prokurorisë së Rrethit Gjyqësor Elbasan po vijon intensivisht puna për fiksimin dhe administrimin e çdo prove materiale që do t’i shërbejë zbardhjes dhe dokumentimit të ngjarjes.

Ndërkohë janë shoqëruar në Drejtoritë Vendore të Policisë Elbasan dhe Tiranë, disa persona të dyshuar se kanë dijeni apo lidhje me ngjarjen, si dhe është bërë e mundur vënia në pranga e autorit të vrasjes, shtetasi A. P., ish punonjës police.

Vijon puna për kapjen dhe arrestimin e personave të tjerë të përfshirë në ngjarje.


Leave a Reply

Your email address will not be published. Required fields are marked *