Vendosni fjalën kyçe....

Rama u jep medalje 4 sipërmarrësve në Vermosh: Keni ndërtuar një mrekulli


Kryeministri Edi Rama, ka shpërndarë një video sot nga Vermoshi. Ai thotë se një zonë turistike është ndërtuar në këtë vend, që sipas tij nuk ka asnjë ndryshim nga Zvicra e Austria.

Ai ka vlerësuar me nga një medalje katër sipërmarrësit, duke u thënë se kanë ndërtuar një mrekulli.

“Gjithçka është bërë me shije të jashtëzakonshme. Çdo gjë është perfekte. Kjo është fantastike. Nuk ka asnjë ndryshim nga Zvicra e Austria. E kanë qarë. Jam i lumtur nga kënaqësia që më ka dhënë ky investim këtu. Zona turistike e Vermoshit nuk m’u duk si reale. Keni bërë një investim këtu privat, një shembull i jashtëzakonshëm i vizionit për të parë larg dhe shembull i respektit për traditën e kthyer në objekte bashkëkohore, por mëshirojnë elementët tradicionalë.

Gjithë zona malore e Shqipërisë do zhvillohet gjithmonë e më shumë. Keni vendosur një gur themeli për vizion tjetër, nuk asgjë mangët nga shembujt më të famshëm të turizmit malor të vendeve në Europë. Dua t’ju jap medalje të veçantë. E meritoni plotësisht këtë medalje”, deklaroi Rama.

Sipërmarrësit e vlerësuar me medalje janë Nikë Kulla, Pllumb Demaj, Dodë Lucaj e Niko Maraçaj, të kthyer nga emigracioni, sipërmarrës të vegjël të zonës. Ata kanë realizuar vizionin e katër bujtinave alpine, që kryeministri thotë se duken si “kartolina të gjalla nga Zvicra”.