Të paktën katër ushtarë irakianë janë plagosur në sulmet me raketa që shënjestruan bazën ajrore Al-Balad, që strehonte trupat amerikane.
Objekti është kthyer në shënjestër të shpeshtë të sulmeve, që kanë nisur pas vrasjes nga ana e SHBA-së të Gjeneralit iranian, Soleimani.
Së paku tetë raketa ‘Katyusha’ goditën bazën e vendosur rreth 80 kilometra në veri të kryeqytetit irakian të Bagdadit, konfirmoi zyra e kryeministrit.
Nuk ka pasur viktima në mesin e personelit ushtarak amerikan. Asnjë grup deri më tani nuk ka marrë përgjegjësi për sulmin.
Sekretari amerikan i Shtetit Mike Pompeo dënoi sulmin por nuk përmendi autorët e mundshëm. Bazat amerikane në Irak u goditën gjithashtu nga një sulm me raketa balistike nga Irani më 8 janar.
