Ish-deputetja e PD-së, Albana Vokshi ka denoncuar vendimin e marrë nga gjyqtarja e Gjykatës së Tiranës, Migena Laska, lidhur me akuzat e Partisë Demokratike ndaj kryebashkiakut të Tiranës, Erion Veliaj, për mbledhjen nga ana e këtij të fundit të të dhënave personale të prindërve të fëmijëve në kopshte e çerdhe.
Vokshi e ka cilësuar absurd vendimin e gjyqtares duke qenë se ai e fajëson pse ka denoncuar aktivitetin e paligjshëm të Veliajt dhe nga ana tjetër ka rrëzuar kërkesën e Veliajt për përgënjeshtrim.
“Disa muaj më parë Partia Demorkatike publikoi dokumenta zyrtarë për të treguar se Erion Veliaj, në shkelje të ligjit, po mblidhte të dhënat personale të prindërve nga kopshtet dhe çerdhet me synim përdorimin e tyre në fushatë elektorale. Pa bërë asnjë hetim për këtë, në shkelje të çdo procedure të drejtë dhe të paanshme, gjyqtarja Migena Laska nuk i ka dhënë të drejtë mijëra prindërve që shprehin shqetësim për marrjen e paligjshme nga Bashkia e Tiranës të të dhënave të tyre personale, por, në mënyrë të padrejtë, i është nënshtruar pushtetit të Erion Veliajt. Është aq absurd ky vendim, saqë nga njëra anë më bën me faj pse kam denoncuar aktivitetin e paligjshëm të Erion Velisë, nga ana tjetër rrëzon kërkesën e tij që unë të bëj përgënjeshtrim.” – shkruan Vokshi në “Facebook”.
Më tej Vokshi thekson në qëndrimin e saj se ka mbrojtur interesin publik dhe se drejtësia e korruptuar dhe e frikësuar me vettingun politik nuk kanë për t’ia mbyllur gojën në denoncimin e krimeve të pushtetit.
Ajo shkruan gjithashtu se PD disponon dokumente të tjera zyrtarë që vërtetojnë se kryebashkiaku Veliaj vijon të shkelë ligjin duke mbledhur të dhënat personale të prindërve të fëmijëve.
“Unë jam e qetë, sepse e di që kam mbrojtur interesin publik dhe jam bërë zëri i mijëra prindërve, të dhunuar në të drejtat e tyre nga Kryetari mashtrues i Bashkisë se Tiranës. Në ketë betejë nuk kam për të bërë asnjë hap pas! As Erion Veliaj, as Edi Rama, as drejtësia e tyre e korruptuar apo e frikësuar deri në palcë me vetingun politik, nuk kanë për të më ndalur dhe nuk kanë për t’ia mbyllur gojën opozitës nga denoncimi i krimeve të pushtetit dhe akteve të tij korruptive. PD disponon dokumenta të tjerë zyrtarë që vërtetojnë se Kryetari i Bashkisë Erion Veliaj vazhdon të shkelë ligjin duke mbledhur të dhënat personale të prindërve të fëmijëve, që regjistrohen në arsimin parashkollor. Për këtë jemi duke bërë gati denoncimin dhe padinë kundër Kryetarit të Bashkisë së Tiranës. Në lidhje me vendimin e padenjë të gjyqtares Laska do të marr çdo hap ligjor për ta zhbërë atë!.” – mbyll statusin e saj Vokshi.
