Vendosni fjalën kyçe....

Gazetarët sot në protestë: Arta Marku të kërkojë falje dhe të shkarkohet truproja


Një ditë pas protestës së opozitës, një tjetër protestë pritet të zhvillohet sot. Këtë radhë tubimi organizohet nga gazetarët, për shkak të episodeve të fundit të dhunës ndaj disa prej kolegëve të tyre. Përmendim këtu Dorjana Bezat, Renaldo Salianjin, Erion Skëndajn etj.

Përmes kësaj proteste, gazetarët kërkojnë shkarkimin e menjëhershëm të truprojës së Arta Markut dhe që Prokuroria e Përgjithshmë të kërkojë falje për aktin e kryer ndaj gazetarit Salianji.

“Ditën e premte (12.04) rojet e sigurisë së Prokurores së Përgjithshme të Përkoshme, Arta Marku, ushtruan dhunë fizike ndaj gazetarit Renaldo Salianji, gjatë kohës që po kryente detyrën e tij.
Pak ditë më parë, Kryetari i Bashkisë së Pukës kërcënoi me “varje” gazetarin e emisionit Investigativ “Fiks Fare”, teksa ky i fundit kryente detyrën.

Forcat e policisë penguan gazetaren Dorjana Bezat teksa raportonte live për shembjen e banesave tek “Bregu i Lumit”.
Dhuna policore qëlloi mbi gazetarin Erion Skëndaj gjatë raportimin të protestës së opozitës.

Komuniteti i gazetarëve dënon keto akte të rënda dhe të papranueshme të ndodhura vetëm së fundmi me punonjësit e medias. Këto veprime cënojnë jo vetëm integritetin fizik të gazetarëve, por edhe lirinë e medias.

Sot, gazetarët në Shqipëri po përballen me sulme fizike nga zyrtarë dhe njerëz të pushtetit, sikundër edhe me arrogancën institucionale, që shkel rëndë misionin e medias.
Si reagim i fortë ndaj dhunës që kërcënon gazetarët, heshtjes së institucioneve përgjegjese për të dënuar këto akte, kemi vendosur që ditën e Dielë ora 16:00-17:00 para Prokurorisë së Përgjithshme të protestojmë.

Ne kërkojmë shkarkimin e menjëhershëm të Truprojës së Arta Markut dhe që Prokuroria e Përgjithshmë të kërkojë falje për aktin e kryer.
Ne kërkojmë zbatimin e ligjit për kryetarin e Bashkisë së Pukës.
Ne kërkojmë të na lini të kryejmë detyrën tonë!
Ne protestojmë për çdo akt që cënon lirinë e medias dhe gazetarit!
Lajmësi është i shenjtë!”, thuhet në njoftimin e gazetarëve.

Dy ditë më parë, truproja i kryeprokurores së përkohshme Arta Marku, ka shtyrë me forcë duke përplasur për muri një gazetar, që po përpiqej t’i bënte një pyetje shefes së tij.

Teksa gazetari i TV Klan, Renaldo Salianji i drejtohet Markut me mikrofon në dorë, truproja e bllokon gazetarin me duar dhe më pas e shtyn me forcë duke e larguar.

Më vonë qarkulloi një video e dytë, e cila tregonte se gazetari nuk është hedhur pas muri vetëm nga truproja e kryeprokurores së Përkohshme Arta Markut, por është prekur, me qëllimin për t’u penguar edhe nga socialisti Ulsi Manja.


Leave a Reply

Your email address will not be published. Required fields are marked *