Banorët e Unazës së Re kanë vajtur sot para Komisariatit 6 në Tiranë ku kërkojnë lirimin e të ndaluarve nga policia.
Në një deklaratë për mediat, një nga përfaqësuesit e banorëve tha se policia kërkon të provokojë përplasjen e banorëve me drejtuesit e mjeteve, duke u kërkuar të kalojnë në segmentin që bllokohet nga protesta e banorëve të zonës që kundërshtojnë prishjen e shtëpive të tyre.
Ai i shpreh se ata do të protestojnë deri në anulimin e projektit korruptiv si dhe kërkojnë largimin e qeverisë Rama që sipas tyre është shkaktarja e të gjitha fatkeqësive, ndërsa u bëri thirrje qytetarëve që t’i bashkohen protestës së tyre.
Banorët e Unazës së Re protestojnë prej 143 ditësh në rrugë, kundër prishjes së banesave të tyre nga zgjerimi i rrugës nga Sheshi Shqiponja te Pallati me Shigjeta.
Aktualisht punimet në këtë segment janë ndërprerë pas falsifikimit të dokumenteve për njërin nga lotet e këtij projekti.
