Prej më shumë se një muaji në protesta, studentët as sot nuk do të ndalen por do të përshkallëzojnë protestën e tyre, duke mos qëndruar vetëm para Kryeministrisë.
Ndryshe nga çdo herë tjetër, studentët do të marshojnë në të gjitha institucionet përgjegjëse që kanë hartuar e kaluar ligjin e arsimit të lartë.
Sipas axhendës së tyre të publikuar në rrjetet sociale, studentët janë mblidhur si zakonisht në orën 08:30 pranë fakulteteve, duke protestuar përreth një orë.
Studentët më pas do të rikthehen përpara Ministrisë së Arsimit, ku kanë protestuar që në fillim derisa lëvizja e tyre arriti në shkarkimin e ministres së Arsimit, Lindita Nikolla.
Pas një ore qëndrimi para këtij institucioni, studentët do të marshojnë përsëri drejt Kryeministrisë, për të vazhduar më pas drejt Kuvendit, Presidencës e në fund do të kthejnë sytë nga ambasadat.
Mirëpo ndryshe nga dje, kur u ndalën te përfaqësia diplomatike e SHBA-ve, studentët do të drejtohen në 13:00 edhe në ambasadën e Bashkimit Europian.
Studentët kanë paralajmëruar se nuk do të bëjnë kompromis me kërkesat e tyre dhe pavarësisht VKM-së së miratuar në prag të fundvitit, ata nuk kanë besim se kërkesat e tyre do plotësohen nga qeveria.
