Në kuadër të Forumit të International Democrat Union (IDU) që po zhvillohet në Zagreb, një delegacion i Partisë Demokratike të Shqipërisë, i kryesuar nga Sali Berisha, dhe i Partisë Republikane, i kryesuar nga Fatmir Mediu, zhvilloi një takim me presidentin e IDU, Stephen Harper.
Gjatë takimit, Berisha shprehu mirënjohje për mbështetjen që IDU i ka dhënë Partisë Demokratike në periudha të ndryshme politike në Shqipëri.
Ai ngriti një sërë shqetësimesh për gjendjen e demokracisë në vend, duke iu referuar edhe vlerësimeve ndërkombëtare që e klasifikojnë Shqipërinë si “autokraci elektorale”.
Ndër çështjet e ngritura, sipas tij, ishin ndikimi i krimit të organizuar në ekonomi dhe politikë, korrupsioni në nivele të larta, si dhe ajo që ai e cilësoi si “narco-ekonomi”. Berisha përmendi gjithashtu emigrimin masiv të qytetarëve shqiptarë dhe situatën e procesit të integrimit europian, duke theksuar se ai duhet të bazohet në standarde dhe meritë.
Në takim u diskutua edhe për gjendjen e opozitës dhe për ish-presidentin Ilir Meta, për të cilin u fol për trajtim të padrejtë institucional.
Nga ana e tij, Stephen Harper vlerësoi orientimin pro-NATO të qytetarëve shqiptarë dhe rikonfirmoi mbështetjen e IDU për Partinë Demokratike dhe forcat opozitare në Shqipëri, si dhe për procesin e integrimit europian të vendit.
Në delegacionin shqiptar morën pjesë gjithashtu përfaqësues të Partisë Republikane dhe të Partisë Demokratike, përfshirë deputetë dhe drejtues të strukturave ndërkombëtare.
