Presidenti amerikan Donald Trump tha se u ka kërkuar negociatorëve amerikanë “të mos nxitojnë për një marrëveshje” me Iranin pasi më herët kishte lënë të kuptohej se një marrëveshje ishte afër.
Marrëveshja që po diskutohet raportohet të përfshijë një zgjatje 60-ditore të armëpushimit, rihapjen e Ngushticës së Hormuzit dhe një plan për negociata të mëtejshme mbi programin bërthamor të Iranit.
Në një postim në rrjetet sociale, Trump tha se bisedimet “konstruktive” po vazhdojnë, por se “të dyja palët duhet të marrin kohën e tyre dhe ta bëjnë siç duhet”.
Trump deklaroi të shtunën se marrëveshja ishte “kryesisht e negociuar”, duke nxitur spekulime se një njoftim mund të ishte i afërt.
Zyrtarët iranianë dhanë sinjale të ngjashme gjatë fundjavës, me zëdhënësin e Ministrisë së Jashtme, Esmail Baghaei, i cili tha se të dyja palët janë “shumë afër dhe shumë larg” arritjes së një marrëveshjeje.
Sipas mediave amerikane, marrëveshja e propozuar nuk është një zgjidhje përfundimtare, por lë për t’u negociuar më vonë disa nga çështjet më të vështira, përfshirë lehtësimin e sanksioneve ndaj Iranit, lirimin e fondeve iraniane të ngrira dhe kërkesat e SHBA-së që Irani të kufizojë ambiciet e tij bërthamore, shkruan BBC.
Të hënën, Sekretari amerikan i Shtetit, Marco Rubio, duke folur me gazetarët në Delhi, tha se ekziston “një propozim mjaft solid mbi aftësinë për të hapur ngushticën” dhe për të hyrë në “negociata reale, domethënëse dhe me afat të kufizuar për çështjen bërthamore”.
Marrëveshja e raportuar ka ndarë republikanët, pasi disa prej tyre kanë deklaruar publikisht se ajo është tepër tolerante ndaj Iranit.
