Sekretari amerikan i Mbrojtjes, Pete Hegseth, ka paralajmëruar një rishikim gjashtëmujor të pranisë ushtarake amerikane në Europë, duke u dërguar një mesazh të fortë vendeve aleate të NATO-s se kontinenti duhet të marrë më shumë përgjegjësi për mbrojtjen e vet.
Gjatë takimit të ministrave të Mbrojtjes të NATO-s në Brussels, Hegseth deklaroi se Pentagoni do të analizojë vendosjen e forcave amerikane në Europë dhe se e ardhmja e tyre do të varet nga gatishmëria e vendeve europiane për të rritur shpenzimet ushtarake dhe për të marrë rol më të madh në sigurinë e kontinentit.
“Ky do të jetë një rishikim i vërtetë. Ai synon të sigurojë që NATO po lëviz shpejt dhe në mënyrë të pakthyeshme drejt një modeli ku Europa merr përgjegjësinë kryesore për mbrojtjen e saj”, tha Hegseth.
Ai kritikoi aleatët që, sipas tij, për vite me radhë janë mbështetur te garancitë ushtarake amerikane pa investuar mjaftueshëm në mbrojtje. Sipas sekretarit amerikan, NATO duhet të transformohet në atë që administrata Trump e quan “NATO 3.0”, ku barra e sigurisë ndahet në mënyrë më të barabartë.
Hegseth paralajmëroi se kontributi amerikan në aleancë mund të lidhet drejtpërdrejt me nivelin e investimeve ushtarake të vendeve anëtare.
“Kur aleatët nuk veprojnë me urgjencë për të rritur shpenzimet e mbrojtjes, edhe kontributi ynë do të reduktohet. NATO duhet të jetë një rrugë me dy kahje”, deklaroi ai.
Sekretari amerikan shprehu gjithashtu pakënaqësi ndaj disa vendeve europiane që, sipas tij, refuzuan t’i lejonin SHBA-së përdorimin e bazave ushtarake dhe hapësirës ajrore gjatë operacioneve kundër Iranit.
“Shumë aleatë thanë jo, ose u fshehën pas debateve ligjore, ndërsa kritikuan publikisht SHBA-në për veprime që vetë nuk janë të gatshëm t’i kryejnë. Kjo është e turpshme”, tha Hegseth.
Ai sulmoi gjithashtu prioritetet politike të disa vendeve europiane, duke pretenduar se për vite me radhë fokusi është zhvendosur nga mbrojtja drejt çështjeve si migracioni, klima dhe barazia gjinore, ndërsa investimet ushtarake kanë mbetur pas.
Deklaratat e Hegseth vijnë në një moment kur administrata e Donald Trump po kërkon që aleatët europianë të rrisin ndjeshëm buxhetet e mbrojtjes, me objektivin që vendet e NATO-s të afrohen drejt nivelit prej 5% të Prodhimit të Brendshëm Bruto për shpenzime ushtarake.
Mesazhi i Uashingtonit ishte i qartë: prania ushtarake amerikane në Europë nuk duhet të konsiderohet më e garantuar në formën aktuale dhe aleatët europianë do të duhet të marrin më shumë përgjegjësi për sigurinë e tyre në vitet e ardhshme.
