Shtetet e Bashkuara të Amerikës kanë miratuar shitjen e çipave të avancuar H200 të Nvidia për rreth 10 kompani kineze, por deri tani nuk është realizuar asnjë dërgesë, ndërsa tensionet teknologjike mes Uashingtonit dhe Pekinit vazhdojnë të komplikojnë marrëveshjet.
Sipas Reuters, kompanitë kineze të autorizuara përfshijnë gjigantë si Alibaba, Tencent, ByteDance dhe JD.com.
Gjithashtu, distributorë si Lenovo dhe Foxconn kanë marrë miratim për shpërndarjen e çipave në tregun kinez. Çdo kompani e autorizuar mund të blejë deri në 75 mijë çipa H200 sipas kushteve të licencës amerikane.
Megjithatë, marrëveshjet kanë mbetur pezull pasi autoritetet kineze kanë shtuar kontrollin mbi varësinë nga teknologjia e huaj, ndërsa Pekini po nxit zhvillimin e industrisë vendase të inteligjencës artificiale dhe çipave.
Raporti thekson se CEO i Nvidia-s, Jensen Huang, iu bashkua delegacionit të presidentit Donald Trump në vizitën në Pekin, me shpresën për të zhbllokuar negociatat për shitjen e çipave në Kinë.
Para vendosjes së kufizimeve amerikane për eksportet, Nvidia kontrollonte rreth 95% të tregut kinez të çipave të avancuar për inteligjencën artificiale, ndërsa Kina përfaqësonte rreth 13% të të ardhurave të kompanisë.
Sipas Reuters, Pekini është bërë më i kujdesshëm edhe për shkak të shqetësimeve mbi sigurinë e zinxhirit të furnizimit dhe mundësinë e ndërhyrjeve të huaja në infrastrukturën teknologjike kritike.
Ndërkohë, kritikët në Uashington argumentojnë se shitja e çipave të avancuar Kinës mund të dëmtojë avantazhin amerikan në garën globale të inteligjencës artificiale.
