Gjermania, Franca, Belgjika, Irlanda dhe Holanda do të dërgojnë aeroplanë për të evakuuar qytetarët e tyre në bordin e anijes turistike me destinacion Tenerife, e cila u godit nga një shpërthim vdekjeprurës i hantavirusit, tha të shtunën në Madrid ministri i brendshëm i Spanjës.
Bashkimi Evropian po dërgon dy aeroplanë të tjerë për qytetarët e mbetur evropianë, shtoi Fernando Grande-Marlaska. SHBA-të dhe Mbretëria e Bashkuar kanë konfirmuar se aeroplanët dhe planet e emergjencës po përgatiten për qytetarët jo-BE, vendet e të cilëve nuk ishin në gjendje të dërgonin transport ajror, tha ai.
Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, do të takohet me kryeministrin e Spanjës Pedro Sanchez në Madrid të shtunën pasdite dhe më pas do të udhëtojë për në Tenerife në Ishujt Kanarie, së bashku me ministrat e brendshëm dhe të shëndetësisë të Spanjës për të koordinuar mbërritjen e anijes. Pritet që ajo të ankorohet pranë ishullit midis orës 03:00 GMT dhe 05:00 GMT.
Autoritetet lokale kanë paralajmëruar se evakuimi duhet të ndodhë midis mesditës së së dielës dhe pasdites së së hënës, përpara se kushtet në det të përkeqësohen deri në fund të majit për shkak të motit të stuhishëm.
Anija luksoze turistike MV Hondius u nis për në Spanjë të mërkurën nga brigjet e Kepit të Gjelbër, pasi OBSH-ja dhe Bashkimi Evropian i kërkuan vendit të menaxhonte evakuimin e pasagjerëve në bord pas zbulimit të shpërthimit të hantavirusit.
Organizata Botërore e Shëndetësisë tha të premten se tetë persona ishin sëmurë, përfshirë tre që vdiqën, një çift holandez dhe një shtetas gjerman, shkruan Reuters.
Të gjithë pasagjerët, si dhe 17 anëtarët e ekuipazhit, do të evakuohen, por 30 anëtarë të ekuipazhit do të qëndrojnë në bord dhe do të udhëtojnë drejt Holandës, tha Ministrja e Shëndetësisë e Spanjës, Monica Garcia. Bagazhet dhe trupi i një pasagjeri të ndjerë në anije do të mbeten në bord dhe anija do të dezinfektohet plotësisht me të mbërritur, shtoi ajo.
Qytetarët spanjollë do të zbarkojnë të parët, ndërsa rendi i evakuimit të grupeve të mbetura të qytetarëve do të përcaktohet nga autoritetet shëndetësore. Qytetarët nuk do të jenë në gjendje të zbarkojnë derisa avioni i tyre i evakuimit të jetë gati për t’u nisur, tha Grande-Marlaska.
