Lumir Abdixhiku zyrtarizoi marrëveshjen me Vjosa Osmanin për garim të përbashkët në zgjedhjet e parakohshme parlamentare të 7 qershorit, duke e propozuar Osmanin si bartëse të listës zgjedhore dhe kandidate për presidente.
Vendimi u miratua unanimisht në mbledhjen e Këshillit të Përgjithshëm të Lidhjes Demokratike të Kosovës (LDK), ndërsa Abdixhiku do të jetë kandidat për kryeministër. Ai bëri të ditur se në listën zgjedhore të LDK-së do të përfshihen edhe 19 emra të propozuar nga Osmani.
Mes figurave që do t’i bashkohen listës janë Fahrie Hoti, Jeta Statovci dhe Albena Reshitaj.
Osmani, e cila më parë ishte një nga figurat më të votuara të LDK-së, kishte garuar në zgjedhjet e vitit 2021 në koalicion me Albin Kurtin dhe Lëvizjen Vetëvendosje, përpara se të krijonte subjektin politik Lista Guxo. Marrëdhëniet mes Osmanit dhe LVV-së u ftohën pas mungesës së mbështetjes për një mandat të dytë presidencial.
Analisti Belgzim Kamberi e cilësoi afrimin Osmani-LDK si “risinë kryesore” të këtyre zgjedhjeve, duke vlerësuar se efekti elektoral mund ta forcojë ndjeshëm LDK-në.
Ndërkohë, Lëvizja Vetëvendosje konfirmoi sërish unanimisht Albin Kurtin si kandidat për kryeministër në zgjedhjet e 7 qershorit. Gjatë mbledhjes së Këshillit të Përgjithshëm të LVV-së, Kurti deklaroi se synon të fitojë 60 për qind të votave.
LVV-ja ka konfirmuar gjithashtu vazhdimin e koalicionit me Guxo-n, Alternativën dhe Partinë Shqiptare Demokristiane.
Në kampin opozitar, Partia Demokratike e Kosovës po shqyrton ofertat për bashkëpunim nga Nisma Socialdemokrate dhe Aleanca Kosova e Re. Kreu i Nismës, Fatmir Limaj, i ka dërguar një letër kryetarit të PDK-së, Bedri Hamza, ku shpreh gatishmërinë për “bashkëpunim dhe bashkim politik” në funksion të krijimit të një alternative opozitare.
Sipas Komisionit Qendror të Zgjedhjeve, 22 subjekte politike dhe tri koalicione janë regjistruar për pjesëmarrje në zgjedhjet e 7 qershorit, ndërsa nëntë subjekte kanë hequr dorë nga garimi.
Zgjedhjet e parakohshme parlamentare do të mbahen pasi Kuvendi i Kosovës dështoi të zgjedhë presidentin e ri brenda afateve kushtetuese. Këto do të jenë zgjedhjet e treta parlamentare brenda 18 muajve në Kosovë.
