Një 23-vjeçar është arrestuar nga policia në Bajram Curri, pasi u konstatua duke qarkulluar i dehur dhe me armë zjarri në automjet.
Sipas njoftimit të Policisë së Tropojës, i riu, me inicialet A. Gj., banues në Bajram Curri, u kap në flagrancë teksa drejtonte një automjet tip “Benz”. Gjatë kontrollit, shërbimet e policisë i gjetën një armë zjarri pistoletë me municion luftarak.
Nga testi i alkoolit rezultoi se 23-vjeçari ishte në gjendje të dehur.
Hetimet paraprake tregojnë se ai dyshohet të ketë qëlluar më herët në ajër me armën që e posedonte pa leje.
Materialet procedurale i janë referuar Prokurorisë për veprime të mëtejshme.
