Platforma e videolojërave Roblox njoftoi të hënën se do të krijojë llogari të personalizuara për përdoruesit e rinj, në një përpjekje për të forcuar sigurinë online, ndërsa përballet me një shqyrtim të fortë global lidhur me shqetësimet për rrezikimin e fëmijëve.
Përmes sistemit të verifikimit të moshës ose kontrollit nga prindërit, Roblox do t’i caktojë përdoruesit e moshës 5 deri në 8 vjeç në llogari “Roblox Kids”, ndërsa ata nga 9 deri në 15 vjeç në llogari “Roblox Select”. Këto llogari do të fillojnë të zbatohen në fillim të qershorit.
“Do të prezantojmë gjithashtu, në të njëjtën kohë, kërkesa të reja për standardet e përmbajtjes që duhet të përmbushen në mënyrë që lojërat ose përmbajtjet të shfaqen në llogaritë Roblox Kids apo Roblox Select,” tha drejtori i sigurisë Matt Kaufman gjatë një konference për shtyp.
Gjatë viteve të fundit, Roblox është përballur me kritika të forta nga qeveri në mbarë botën për akuza se nuk ka arritur të mbrojë fëmijët nga grabitqarët seksualë dhe shfrytëzimi.
Lojërat që do të shfaqen në llogaritë “Roblox Kids” do të kufizohen sipas niveleve të përshtatshmërisë për moshën dhe do të duhet të kalojnë një “proces të rreptë shqyrtimi me tre hapa”, me kërkesa të forta për krijuesit, tha Kaufman.
Funksioni i bisedës (chat) do të jetë i çaktivizuar si parazgjedhje për llogaritë “Kids”, ndërsa do të aktivizohet gradualisht për llogaritë “Select” në varësi të moshës.
Si pjesë e procesit të shqyrtimit me tre hapa, Roblox kërkon që zhvilluesit të verifikojnë identitetin e tyre, të aktivizojnë verifikimin me dy hapa dhe të mbajnë një abonim aktiv në Roblox Plus.
Roblox njoftoi të premten se do të lançojë këtë plan abonimi më 30 prill. Ai do të kushtojë 4.99 dollarë në muaj dhe do të përfshijë zbritje për artikuj brenda lojës dhe avatarë, si dhe përfitime të tjera në platformë, shkruan Reuters.
