Autoritetet turke kanë bllokuar qasjen në platformën e njohur të mesazheve “Discord” pas shqetësimeve se aplikacioni po përdorej për të synuar fëmijët për manipulim, shantazh dhe ngacmim kibernetik. Masa vjen pasi platforma me bazë në SHBA e gjeti veten të ndaluar edhe në Rusi këtë javë.
Autoriteti i Teknologjive të Informacionit të Turqisë (BTK) publikoi zyrtarisht vendimin për ndalimin e qasjes në platformën në fjalë të mërkurën pas një vendimi të gjykatës.
Ministri i Drejtësisë Yilmaz Tunc ka shpjeguar se gjykata ka urdhëruar që të hiqen të gjitha publikimet në platformën e mediave sociale dhe të kufizohet qasja në faqen e internetit në vend, mbi “dyshimin e mjaftueshëm për krimet seksuale ndaj fëmijëve, abuzim dhe turpësi” që janë kryer duke përdorur Discord.
“Ne jemi të vendosur të mbrojmë rininë dhe fëmijët tanë, sigurinë e së ardhmes sonë, nga publikimet e dëmshme të mediave sociale dhe internetit që përbëjnë krime. Ne kurrë nuk do lejojmë përpjekjet për të tronditur themelet e strukturës sonë shoqërore.” ka shkruar Tunc në një postim në X.
Discord u vu nën dyshim të rregullatorëve turq pasi një 19-vjeçar vrau dy gra javën e kaluar. Pas incidentit, media turke raportoi se disa përdorues në Discord po lavdëronin vrasjen e dyfishtë, e cila më pas çoi në zemërim publik kundër disa komuniteteve në platformë.
Ndalimi i shërbimit të mesazheve nga Turqia vjen pasi mbikëqyrësi rus i medias Roskomnadzor gjithashtu bllokoi platformën të martën. Sipas vendimit, qasja në Discord është kufizuar për shkak të “shkeljes së kërkesave të legjislacionit rus” dhe kundërshtimit të tij për të hequr “informacionet e paligjshme”.
Roskomnadzor ka kërkuar që platforma të heqë afro 950 postime që thuhet se përmbajnë përmbajtje të paligjshme si thirrje për vetëvrasje, ekstremizëm, abuzim seksual të fëmijëve dhe “propagandë LGBT”.
