Një sulm izraelit ka shkatërruar ndërtesën e konsullatës iraniane në kryeqytetin e Sirisë, Damask, duke vrarë një numër njerëzish, raportojnë mediat shtetërore siriane.
Fotot treguan tym dhe pluhur që ngrihej nga struktura e rrafshuar, e cila ishte ngjitur me ambasadën iraniane në një autostradë në distriktin perëndimor Mezzeh.
Një agjenci iraniane e lajmeve tha se pesë persona u vranë, ndërsa një grup monitorues me bazë në Mbretërinë e Bashkuar raportoi për tetë persona.
Ushtria izraelite tha se nuk komenton raportet e mediave të huaja.
Ushtria siriane tha se avioni izraelit shënjestroi rreth orës 17:00 me kohën lokale, ndërtesën e konsullatës nga drejtimi i Lartësive Golan të pushtuara.
Mbrojtja ajrore siriane rrëzoi disa nga raketat e lëshuara nga avioni, por të tjera goditën ndërtesën dhe çuan në shkatërrimin e plotë të saj dhe në vrasjen ose plagosjen e të gjithë atyre që ishin brenda në atë kohë, shtoi ushtria.
Ushtria tha se po punohej për të nxjerrë viktimat nga poshtë rrënojave.
Detaje në lidhje me identitetin e të vrarëve nuk u dhanë, por TV shtetëror iranian raportoi se asnjë personel i ambasadës nuk ishte brenda ndërtesës në momentin e sulmit.
Një burim libanez i sigurisë i tha agjencisë së lajmeve Reuters se mes të vrarëve ishte një komandant i lartë i Gardës Revolucionare të Iranit, Mohammad Reza Zahedi.
