Një grua transgjinore 18-vjeçare në shtetin amerikan të Pensilvanisë, e cila qëlloi për vdekje një vajzë të re dhe më pas rrëfeu krimin në Instagram, është dënuar deri në 40 vjet burg, njoftuan prokurorët, shkruan Newsweek.
Ash Cooper, i njohur si Joshua Cooper në kohën e vrasjes së kryer në vitin 2022, filloi tranzicionin gjinor pas arrestimit. Cooper, i cili atëherë ishte 16 vjeç, i tha policisë se ai dhe viktima, 12-vjeçari Morgan Connors, ishin në një marrëdhënie seksuale.
“Ash Cooper, i cili më parë kishte qenë Joshua Cooper, u deklarua fajtor të enjten për vrasje të shkallës së tretë, armëmbajtje pa leje dhe manipulim ose fabrikim të provave fizike”, tha në një deklaratë zyra e Prokurorit të Qarkut të Buck.
“Gjyqtari e dënoi Cooper me 15 deri në 40 vjet burgim shtetëror dhe një dënim të njëpasnjëshëm prej shtatë vitesh provë,” shtoi zyra e prokurorit të qarkut.
Gjithashtu autori i krimit është urdhëruar t’i nënshtrohet një vlerësimi psikologjik dhe psikiatrik.
Sipas hetimeve, vrasja ndodhi në një park më 25 nëntor 2022. Dy miqtë thuhet se po shikonin Netflix kur Connors u ngrit për të përdorur banjën.
Më pas Cooper e qëlloi atë duke përdorur armën e babait të tij dhe kontaktoi një të njohur, gjithashtu një adoleshent, përmes një videochat-i në Instagram, duke treguar trupin e viktimës të mbuluar me gjak dhe duke kërkuar ndihmë për ta hequr atë.
Më pas dëshmitarja i tha nënës së saj, e cila nga ana e saj thirri policinë për të raportuar vrasjen e mundshme.
Cooper thuhet se pohoi se vrasja ishte një aksident, duke thënë se ai kishte frikë të shkonte në burg për pjesën e mbetur të jetës.
