Personat që u shpëtuan nga një gomone që po fundosej në Detin Mesdhe kanë njoftuar se rreth 60 persona që ishin nisur nga Libia së bashku me ta një javë më parë, vdiqën gjatë udhëtimit, njoftoi të enjten grupi humanitar i shpëtimit SOS Mediterranee.
Anija Ocean Viking e organizatës bamirëse europiane zbuloi gomonen me 25 persona në bord të mërkurën.
Dy prej tyre ishin në gjendje të pavetëdijshme dhe u evakuuan me helikopterë nga Roja Bregdetare Italiane për kujdes mjekësor. 23 persona të tjerë ishin në gjendje të rëndë, të lodhur dhe të dehidratuar.
Zëdhënësi i organizatës SOS Mediterranee, Francesco Creazzo, tha se të mbijetuarit ishin të gjithë meshkuj, 12 prej tyre minorenë.
Ata janë nga Senegali, Mali dhe Gambia.
Zoti Creazzo shtoi se të mbijetuarit ishin të traumatizuar dhe nuk ishin në gjendje të kujtojnë qartësisht se çfarë kishte ndodhur gjatë udhëtimit.
Organizata Ndërkombëtare për Migracionin thotë se 227 persona kanë vdekur në rrugën e rrezikshme në Mesdheun Qendror nga fillimi i vitit deri në 11 mars, pa përfshirë në këtë bilanc, njoftimet e fundit për personat që rezultojnë të humbur apo mendohet të jenë të vdekur.
Në total, 279 persona kanë humbur jetën në Mesdhe që prej 1 janarit.
19,562 persona kanë shkuar në Itali duke përdorur këtë rrugë përgjatë së njëjtës periudhë.
Të mërkurën gjatë natës, anija Ocean Viking shpëtoi 113 persona të bllokuar në ujrat ndërkombëtare.
