Aleksandër Gjoka, Indrit Mesiti, Adelina Ismajli, Fitnete Tuda, Elena Kadare, Natasha Lako, Anila Aliu, Shpëtim Kushta, Victor Van Vought, Zana Shuteriqi dhe Shkumbin Ahmetxheka janë 11 anëtarët e jurisë profesioniste të Festivalit të 62 të këngës në RTSH.
Këngët pjesëmarrëse në Fest 62 do të kalojnë këto 4 natë në “lupën” e emrave të mëdhenj të artit shqiptar nga fusha e muzikës, e letrave, vokalit, kritikës muzikore, si dhe kompozicionit.
Juria do të vendosë për 6 çmime, mes tyre edhe këngën fituese të çmimit të parë të Festivalit. Ndërkohë, edhe këtë vit do të jetë publiku, i cili do të vendos se cila këngë do të përfaqësojë Shqipërinë në Eurovizion.
Votimi do hapet në fund të natës së dytë, pasi janë shfaqur të 31 këngët konkurruese. Votimi do të qëndrojë i hapur deri në fund të natës finale ku do të shpallen edhe fituesit e kësaj gare plot emocione.
Festivali vjen në regjinë e Pali Kukës dhe skenar të Enkel Demit, ndërsa moderimi i është besuar balerinit Kledi Kadiu, aktores dhe deputetes nga Kosova Adriana Matoshit, Krisa Caushit (moderatorë në RTSH) dhe Xhuliano Xhules (komedian).
