Deputetët demokratë janë përplasur me punonjësit e Gardës teksa sot mbahet seanca për miratimin e buxhetit 2024.
Deputetët Salianji, Dogjani, Nallbati e të tjerë janë përpjekur të mbledhin karriget e deputetëve në mes të sallës së parlamentit siç kanë bërë në seancat e mëhershme po janë penguar nga punonjësit e Gardës.
Në videon e publikuar duken deputetët teksa shtyjnë përpara me karrige në dorë ndërkohë që punonjësit e Gardës përpiqen t’i frenojnë.
Salianji dëgjohet diku i drejtuar punonjësve të Gardës me fjalët: “Hiqi duart, nuk ke detyrë ti të zësh vendet e deputetëve aty. Hajde sillni të tjera, hajde.”
Ndërsa deputeti Dogjani i drejtohet një punonjëseje duke i thënë: “Ik moj vajzë ti andej.”
Për seancën e sotme janë të përjashtuar kreu i Rithemelimit Berisha, Gazment Bardhi, Edi Paloka, Flamur Noka, Albana Vokshi e Elda Hoti.
Ata u përjashtuan nga Kuvendi pas kërkesës së PS-së për sjelljen e tyre në seancën e fundit.
Në një deklaratë dje, Berisha tha se mosbindja civile e aksioni i opozitës nuk do ndalet.
