Administrata e presidentit amerikan Joe Biden ka kontaktuar zyrtarët izraelitë për të kërkuar sqarime të pretendimeve të kryeministrit Benjamin Netanyahu se Izraeli do e mbajë kontrollin e sigurisë së Gazës pas përfundimit të konfliktit të tij me Hamasin, sipas raporteve të mediave izraelite.
Keqkuptimi i supozuar mes aleatëve fillimisht u raportua të dielën nga transmetuesi shtetëror Kan dhe më vonë u konfirmua për Times of Israel nga një zyrtar amerikan i paidentifikuar.
Sipas raporteve, Uashingtoni ishte i hutuar nga komentet që Netanyahu bëri për të ardhmen e Gazës pas fundit të luftës.
Gjatë një konference për shtyp të shtunën, kryeministri hodhi poshtë mundësinë që Autoriteti Palestinez të merrte kontrollin e enklavës pas luftës, duke këmbëngulur se “nuk do të ketë një autoritet civil atje që i edukon fëmijët e tyre të urrejnë Izraelin, të vrasin izraelitët, ose për të eliminuar Izraelin” dhe se autoriteti ende nuk e ka dënuar Hamasin për sulmin e tij ndaj vendit më 7 tetor, ku u vranë 1,400 njerëz.
“Do duhet të ketë diçka tjetër, por në çdo rast kontrolli ynë i sigurisë. Unë i qëndroj asaj dhe nuk kam ndërmend të dorëzohem,” këmbënguli ai, duke përsëritur pretendimin që bëri në një intervistë me ABC News të martën.
Kan tha se zyrtarët amerikanë donin që homologët e tyre izraelitë t’u shpjegonin atyre se çfarë saktësisht nënkuptonte Netanyahu me “kontrollin e sigurisë”.
