Shtetet e Bashkuara po dërgojnë një grup amfib prej mijëra marinarësh dhe marinsash amerikanë drejt Izraelit, ku ata do pozicionohen në bordin e anijeve luftarake në rast se konflikti atje me Hamas-in zgjerohet.
Dy zyrtarë të mbrojtjes, duke folur në kushte anonimiteti mbi lëvizjet e planifikuara ushtarake, thanë se Grupi i Gatishëm Amfib Bataan, që numëron më shumë se 4,000 marinarë dhe marinsa, do t’i bashkohet një flote amerikane në rritje në brigjet e Izraelit që do përfshijë dy aeroplanmbajtëse dhe anijet shoqëruese të tyre.
Njësia e 26-të e Ekspeditës Detare, brd në Camp Lejeune, N.C., është vendosur me task forcën amfibe. Njësia Detare është e stërvitur për një gamë të gjerë misionesh, duke përfshirë operacione speciale.
USS Bataan dhe USS Carter Hall, dy nga luftanijet që transportonin personel për njësinë, ishin në Gjirin e Omanit të hënën, pasi u larguan nga Kuvajti kohët e fundit pas sulmit të Hamas-it ndaj Izraelit më 7 tetor.
Anija e tretë e lidhur me njësinë, USS Mesa Verde, ishte në Detin Mesdhe dhe do nisej pranë bregut izraelit, thanë zyrtarët e mbrojtjes.
Dislokimi është shfaqja e fundit e mbështetjes së Uashingtonit për Izraelin, ku 1,400 njerëz janë vrarë dhe më shumë se 4,100 janë plagosur që nga fillimi i sulmit nga militantët e Hamasit.
Dislokimi pasqyron gjithashtu shqetësimet e zyrtarëve amerikanë për një luftë më të gjerë, ndërsa përleshjet me Hezbollah-un e mbështetur nga Irani, forcën militante dhe politike libaneze, shtohen përgjatë kufirit verior të Izraelit dhe Teherani kërcënon ‘veprim parandalues’ të papërcaktuar për të penguar një sulm izraelit në Gaza.
Izraeli, i cili i shpalli luftë Hamas-it në Gaza dhe ka bombarduar enklavën me sulme ajrore, po përgatitet të nisë atë që parashikohet të jetë një ofensivë tokësore.
Zyrtarët palestinezë thanë se të paktën 2,700 njerëz janë vrarë dhe 9,900 janë plagosur në sulmet izraelite që nga sulmi, dhe grupet ndërkombëtare po paralajmërojnë për një krizë humanitare në përshkallëzim.
Shtëpia e Bardhë njoftoi se Presidenti Biden do udhëtojë në Izrael të mërkurën në shenjë solidariteti për aleatin e SHBA-së dhe si pjesë e një udhëtimi që do përfshijë takime me liderët arabë në Jordani.
Zëdhënësi i Këshillit të Sigurisë Kombëtare, John Kirby, u tha gazetarëve javën e kaluar se Shtetet e Bashkuara ‘nuk kishin ndërmend të vendosnin çizmet e SHBA-së në terren’, që do të thotë forcat luftarake. Një kontigjent i vogël trupash amerikane janë në ambasadën amerikane në Jerusalem, duke këshilluar zyrtarët izraelitë.
Sekretari i Mbrojtjes Lloyd Austin foli me homologun e tij izraelit, Yoav Gallant, të hënën dhe përsëriti zotimin e SHBA-së për të ‘vijuar përshpejtimin e ndihmës së sigurisë dhe parandalimin e përshkallëzimit të konfliktit’, tha zëdhënësja e Pentagonit Sabrina Singh.
Javën e kaluar, administrata Biden vendosi grupin sulmues të aeroplanmbajtëses USS Gerald R. Ford në rajon dhe njoftoi të shtunën se po dërgon gjithashtu grupin sulmues të aeroplanmbajtëses USS Dëight D. Eisenhower nga Virxhinia.
Të kombinuara, dislokimet ka të ngjarë të vendosin më shumë se një duzinë luftanije në brigjet e Izraelit, në një përqendrim të rrallë të fuqisë amerikane të zjarrit që synon në mënyrë të qartë të pengojë Hezbollah-un nga sulmi ndaj Izraelit.
Javën e kaluar, Biden denoncoi sulmin nga Hamasi si ‘një e keqe e madhe’ dhe tha se Shtetet e Bashkuara ‘do sigurohen që Izraeli të ketë atë që i nevojitet për t’u kujdesur për qytetarët e tij, për të mbrojtur veten dhe për t’iu përgjigjur këtij sulmi’.
VINI RE: Ky material është pronësi intelektuale e Washington Post
