Anëtarja e këshillit bashkiak të Partisë së Lirisë në Bashkinë e Tiranës, Silva Caka ka kërkuar sot informacion për situatën në çerdhe e kopshte, duke ngritur shqetësimin për procesin e aplikimit dhe pranimit të fëmijëve në çerdhe dhe kopshte.
Caka tha në një deklaratë për mediat se prindërit janë të shqetësuar pasi mos regjistrimi i fëmijëve në kopshtet publike, i detyron ata të paguajnë disa fish më shumë në kopshtet private.
Ajo deklaroi se i janë drejtuar me shkresë zyrtare Bashkisë së Tiranës, ku i kërkojnë informacion lidhur me aplikimet në çerdhe e kopshte, pranimet, grupet, institucionet dhe numrin e fëmijëve dhe edukatoreve.
DEKLARATA E PLOTË
Ditët e fundit, si pasojë e nisjes së vitit të ri akademik në çerdhet dhe kopshtet e Tiranës, pranë Partisë së Lirisë, në cilësinë e këshilltarëve në Këshillin Bashkiak të Tiranës, kemi zhvilluar mjaft takime me prindër të shqetësuar për procesin e aplikimit dhe pranimit të fëmijëve në çerdhe dhe kopshte.
Shqetësimi më i madh lidhet me refuzimin e regjistrimit të fëmijëve në këto institucione, duke i detyruar prindërit të regjistrojnë fëmijët e tyre në çerdhe apo kopshte private, ku pagesa mujore varion 5-10 fish më shtrenjtë se në ato publike.
Kjo është një kosto shtesë shumë e lartë për një familje të re, e cila përballet çdo ditë me kostot e shtuara të jetesës në Tiranë, sidomos në rastet kur familjet e reja kanë 2 apo më shumë fëmijë.
Një tjetër shqetësim, i ardhur nga prindërit që kanë pasur fat me regjistrimin e fëmijëve në çerdhet dhe kopshtet publike, është ai i mbingarkesës me fëmijë, për hapësirat që ofrojnë kopshtet apo çerdhet, duke bërë të pamundur zhvillimin normal të procesit mësimor.
Duke parë të dhënat e viteve të kaluara, ku numri i fëmijëve në Tiranë ishte pothuajse sa dyfishi i atyre që kishin mundur të regjistroheshin në çerdhe apo kopshte, natyrshëm na lind pyetja mbi infrastrukturën arsimore në Tiranë, e cila duhet të akomodojë një numër të madh fëmijësh.
Për këto arsye, bazuar në ligjin për të drejtën e informimit, po i drejtohemi me shkresë zyrtare Bashkisë së Tiranës, ku i kërkojmë informacion lidhur me:
- Sa aplikime janë paraqitur pranë Drejtorisë së Përgjithshme të Çerdheve dhe Kopshteve, për regjistrime në çerdhe dhe kopshte në Qershor dhe Shtator 2023?
- Sa nga këto aplikime janë pranuar për t’u regjistruar?
- Sa çerdhe dhe kopshte janë funksionale në të gjithë territorin e Bashkisë së Tiranës?
- Sa grupe janë në çdo çerdhe dhe kopsht të territorit të Bashkisë së Tiranës?
- Sa fëmijë janë në çdo grup dhe a respektohet hapësira 2 m²/ fëmijë në çdo çerdhe dhe kopsht?
- Sa edukatore dhe sa ndihmëse janë për çdo grup?
Këto pyetje kanë për qëllim të informojnë të gjithë prindërit mbi situatën e çerdheve dhe kopshteve në Bashkinë e Tiranës, duke qenë se janë pikërisht ata që paguajnë taksa të shumta, që fëmijët e tyre të kenë një trajtim dinjitoz dhe brenda standardeve europiane, për sa i përket hapësirave, zhvillimit të procesit mësimor, ushqyerjes dhe marrjes së çdo shërbimi tjetër të nevojshëm për fëmijën.
Interesi më i lartë i fëmijës është një parim që duhet të diktojë punën dhe përditshmërinë e secilit prej nesh, por situata e çerdheve dhe kopshteve në Tiranë, krahasuar me situatën e kullave të betonit, lë shumë për të dëshiruar, pavarësisht se Bashkia e Tiranës ka 7 vite që iu vjedh taksën e infrastrukturës arsimore, pa iu ofruar asnjë shërbim në shkëmbim.
Bashkia e Tiranës ka një buxhet prej 275 milionë eurosh në vit, i cili duhet të kanalizohet për nevojat primare të qytetarëve, për edukimin dhe zhvillimin e fëmijëve, por Bashkia zgjedh betonin dhe inceneratorët dhe jo çerdhet dhe kopshtet, fasadën dhe jo shërbimin publik. Dua t’i kujtoj banorëve të Tiranës se Erion Veliaj, vetëm përpara 20 ditësh, i hoqi rreth 6 milionë euro zërit të arsimit në buxhet, për t’ia kaluar atë inceneratorëve.
Këshilltarët e Partisë së Lirisë në Këshillin Bashkiak të Tiranës janë të angazhuar të bëjnë transparencë mbi çdo çështje që shqetëson banorët e Tiranës.
