Qeveria amerikane është e përçarë nëse do t’i bëjë presion Ukrainës që të nisë bisedimet e paqes me Rusinë, me disa zyrtarë që argumentojnë se nuk do ketë kushte më të mira në të ardhmen, raportoi të enjten New York Times, duke cituar burime.
Sipas zyrtarëve të Shtëpisë së Bardhë të intervistuar nga gazeta, gjenerali Mark Milley, i cili kryeson Shefat e Shtabit të SHBA-së, deklaroi gjatë takimeve të brendshme se forcat e Kievit kishin arritur gjithçka që mund të prisnin në mënyrë të arsyeshme përpara se të fillojë dimri dhe ‘duhet të përpiqen të çimentojnë fitimet në tryezën e bisedimeve’ me Rusinë.
Milley me sa duket po i referohej vendimit të fundit të Moskës për të tërhequr trupat e saj nga bregu i djathtë i lumit Dnieper, duke përfshirë qytetin Kherson.
Megjithatë, zyrtarë të tjerë të lartë thuhet se kundërshtojnë linjën e të menduarit të Milley, duke argumentuar se as Moska dhe as Kievi nuk janë gati për bisedime tani, ndërsa çdo qetësi në luftime do lejonte Rusinë të rigrupohej.
Edhe pse ata besojnë se konflikti përfundimisht do të zgjidhet përmes diplomacisë, konsensusi është se momenti për bisedime ‘nuk është pjekur’ dhe SHBA-ja nuk duhet të shihet si përpjekje për të frenuar Kievin mbrapa teksa ai ‘ka vrull’.
Raporti vjen pasi presidenti amerikan Joe Biden tha të enjten se ai nuk ‘mendon se konflikti do të zgjidhet derisa presidenti rus Vladimir Putin të largohet nga Ukraina’.
Në të njëjtën ditë, Këshilltari i Sigurisë Kombëtare i SHBA-së, Jake Sullivan, pohoi se Uashingtoni ‘nuk po i bën presion Ukrainës’ të hyjë në bisedime me Rusinë, duke këmbëngulur se vetëm po e ‘këshillon’ Kievin si partner dhe po i ofron atij forma të ndryshme mbështetjeje.
