Ish-presidenti rus Dmitry Medvedev këtë të premte e ka cilësuar luftën e Rusisë në Ukrainë si një konflikt të shenjtë me Satanin, duke paralajmëruar se Moska mund t’i dërgojë të gjithë armiqtë e saj në “zjarret e përjetshme të Gehenës”.
Pushtimi rus i Ukrainës ka vrarë dhjetëra mijëra dhe ka shkaktuar konfrontimin më të madh me Perëndimin që nga kriza e raketave Kubane e vitit 1962, kur superfuqitë e Luftës së Ftohtë iu afruan më shumë luftës bërthamore.
Reuters shkruan se Medvedev, i cili dikur e konsideronte veten si një modernizues liberal si president nga viti 2008 deri në vitin 2012, tha se Moska po luftonte “narkomanët nazistë të çmendur” në Ukrainë, të mbështetur nga perëndimorët, të cilët ai tha se “u rrjedh pështymë në mjekër nga degjenerimi”.
Ukraina dhe Perëndimi i kanë hedhur poshtë vazhdimisht pohimet e Presidentit Vladimir Putin se Ukraina drejtohet nga fashistët që kanë persekutuar rusishtfolësit. Në vend të kësaj, ata e konsideruan luftën si një rrëmbim brutal të tokës nga Moska.
Në një mesazh për Ditën e Unitetit Kombëtar të Rusisë, Medvedev tha se detyra e atdheut ishte “të ndalojë sundimtarin suprem të Ferrit, çfarëdo emri që ai përdor – Satanai, Lucifer apo Iblis”.
Medvedev i cili tani është nënkryetar i Këshillit të Sigurimit të Rusisë, tha se Rusia kishte armë të ndryshme, duke përfshirë aftësinë për të “dërguar të gjithë armiqtë tanë në Gehenën e zjarrtë”, duke përdorur kështu një term hebraik që shpesh përkthehet si Ferr.
Që nga fillimi i luftës, retorika e Medvedevit është bërë gjithnjë e më e ashpër.
Medvev tha se armët e Satanait ishin “gënjeshtrat e ndërlikuara. Dhe arma jonë është e vërteta. Prandaj kauza jonë është e drejtë. Prandaj fitorja do të jetë e jona! Gëzuar festat!”
